Prezident İlham Əliyev ADA Universitetində keçirilən “Yeni dünya nizamına doğru” mövzusunda beynəlxalq forumda çıxışı zamanı Avropa Komissiyasının Azərbaycana münasibətinə toxunub.
Dövlətimizin başçısı bununla bağlı deyib: “Bu gün Avropa Komissiyasında çəhrayı eynəkləri çıxarmalıdırlar, dünyaya real gözlə baxmalıdırlar, Azərbaycan kimi dövlətlərə dəyər verməlidirlər. Cənubi Qafqazı özlərinin sevimli və ya qeyri-sevimli dövlətlərinə bölməli deyillər”.
Milli Məclisin deputatı Asim Mollazadə "Sherg.az"a deyib ki, əslində AK Azərbaycana qarşı qərəzli mövqe sərgiləməklə haqsızlığın olduqca kobud və açıq bir formasını nümayiş etdirir:
"AK bəzən hətta Avropa Birliyinin ümumi maraqlarına uyğun gəlməyən qərarlar qəbul edir. Bu vəziyyətin əsas səbəblərindən biri də çox güclü, təşkilatlanmış və maliyyə baxımından imkanlı erməni diasporasının bu istiqamətdə göstərdiyi davamlı təzyiqlərdir. Bir sıra ölkələr məhz erməni diasporasının təsiri ilə öz siyasətlərini dəyişir, müdaxilələrini həmin maraqlara uyğunlaşdırır. Nəticə etibarilə Azərbaycana qarşı açıq-aşkar haqsızlıqlar törədirlər. Bu isə tamamilə qəbuledilməzdir. Erməni diasporasının əsas məqsədi regionda sülh və sabitliyi pozmaq, müharibə vəziyyətinin davam etməsinə nail olmaq, revanşist meylləri gücləndirmək və nəticədə Ermənistanda yeni faciələrin baş verməsinə zəmin yaratmaqdır. Ümumilikdə, bu qüvvələr tarix boyu həyata keçirdikləri soyqırımı siyasətini bu gün də fərqli formalarda davam etdirmək istəyirlər".
