"AXP-nin iştirakı üzvlərin öz mövqelərini sərbəst şəkildə müəyyənləşdirməsi şəklində həyata keçirilsin".
"Partiya üzvü bu seçkilərdə seçki məntəqələrinə getmək və ya getməmək, habelə seçkidə namizəd kimi iştirak barədə özü qərar qəbul edir".
Sabir baş nazir Pənah Hüseynin rəhbərlik etdiyi Azərbaycan Xalq Partiyası 2025-ci ilin yanvarın 29-da keçiriləcək bələdiyyə seçkisində iştirakla bağlı qərarını açıqlayıb.
"Sherg.az"ın məlumatına görə, AXP-nin seçki ilə bağlı yaydığı bəyanatda bildirilib ki, bələdiyyə seçkiləri Azərbaycan cəmiyyətində uzun müddətdir müzakirə edilən və zəruriliyi barədə demək olar ki, ictimai konsensus olan seçki islahatı və yerli özünüidarə islahatı aparılmadan keçiriləcək.
Qeyd olunub ki, mövcud seçki komissiyalarına etimadın yoxluğu, yerli özünüidarə orqanlarının səlahiyyətsizliyi və faktiki olaraq formal xarakter daşıması bütövlükdə cəmiyyətdə və o cümlədən AXP üzvləri arasında bu seçkilərdə tam şəkildə iştiraka maraq göstərilməməsi ilə müşahidə edilir:
"Buna baxmayaraq AXP İdarə Heyəti seçkilərdən iştirakdan imtina haqqında siyasi qərarın verilməsini məqsədəuyğun hesab etmir. Bu seçkilərdən partiyanın proqram məqsədlərinin xeyrinə siyasi təbliğatın aparılması, partiya üzvləri və yerli strukturların fəallaşması üçün istifadə edilməsini mümkün sayaraq, eyni zamanda seçkilərlə əlaqədar siyasi, hüquqi və təşkilati şəraiti, şərt və resurs vəziyyətini dəyərləndirərək AXP-nin iştirakı üzvlərin öz mövqelərini sərbəst şəkildə müəyyənləşdirməsi şəklində həyata keçirilsin. Yəni hər bir AXP üzvü bu seçkilərədə seçki məntəqələrinə getmək və ya getməmək, habelə seçkidə namizəd kimi iştirak barədə özü qərar qəbul edir. Əgər AXP üzvü seçkidə namizədliyini irəli sürərsə və bu zaman partiya üzvlüyünü müvafiq seçki sənədlərində qeyd edərsə, bütövlükdə AXP və yerlərdəki strukturları və üzvləri onun seçilməsinə yardım göstərəcək. AXP yerli strukturları olduqları ərazilərdə seçkilərdə iştirak haqqında və namizədlərin irəli sürülməsi haqqında müzakirələr aparıb namizədlərin müəyyənləşdirilməsi barədə siyasi qərarlar verməkdə sərbəstdirlər".
