"Biz ötən əsrin sonunda itirilən torpaqlarımızı qaytardığımız kimi 100 il bundan öncəkiləri də qaytaracağıq"
Ermənistanın üçüncü prezidenti, Xocalı soyqırımının əsas qatillərindən biri olan Serj Sarkisyan hələ də öz ampluasındadır. İrəvanda keçirilən aksiyada iştirak edən Sarkisyan “Qarabağın heç vaxt Azərbaycanın tərkib hissəsi olmayacağını” söyləyib. Hətta buna yüz faiz “əmin” olduğunu deyib. Sarkisyan İrəvan hökumətini müttəfiq Rusiyanın gücündən istifadə etməməkdə suçlayıb. Vurğulayıb ki, Moskva həmin öhdəlikləri yerinə yetirməyə hazırdır. Lakin bunun üçün Ermənistan rəhbərliyi düzgün addım atmalı, müqavilələrdə nəzərdə tutulan prosedurlara uyğun olaraq Kremlə müraciət etməlidir. O halda Rusiya öz öhdəliklərini yerinə yetirəcək: “Əminəm ki, Ermənistan 44 günlük müharibə zamanı prosedurlara uyğun olaraq Rusiyaya üz tutsaydı, biz bu gün tamam başqa vəziyyətdə olardıq”. Yəni, Sarkisyan və tərəfdaşları hələ də ümid edirlər ki, Rusiya onlara dəstək verəcək, Qarabağı geri alacaqlar.
Millət vəkili Sahib Alıyev deyib ki, Sarkisyan 44 günlük savaş zamanı nələrin baş verdiyini unudub:
“Sarkisyan və digərləri bir reallığı unutmamalıdır ki, əgər Azərbaycanın torpaq bütünlüyünü tanımamaq siyasəti yeritməkdə davam etsələr, biz ötən əsrin sonunda itirilən torpaqlarımızı qaytardığımız kimi 100 il bundan öncəkiləri də qaytaracağıq.
Son günlər davamlı olaraq Göyçənin Yuxarı Şorcasından Kəlbəcərin Zəylik kəndindəki mövqelərimizin atəşə tutulduğu haqda xəbərlər verilir. O yerin coğrafiyasını yaxşı bilən biri kimi deyirəm ki, Azərbaycan Ordusuna əmr verilsə, Yuxarı Şorca 5 dəqiqəyə düşməndən təmizlənər. Xatırladım ki, 1918-ci ilin xəritəsində həmin kəndin yerləşdiyi Göyçə gölünün şərq sahili
Ermənistanın yox, məhz Azərbaycanın tərkibində göstərilir. Yeri gəlmişkən, Qarabağdakı ermənilərin “hüqüq, azadlıq və status”larından dəm vuran Ermənistan rəhbərliyi Göycə, Zəngəzur, Dərələyəzdən didərgin salınan azərbaycanlıların hüquqları haqda nə düşünür? Əgər onlara elə gəlirsə ki, bu suallar heç vaxt rəsmi səviyyədə qarşılarında verilməyəcək, yenə də böyük səhv edirlər”.
