"Boş danışıqlardansa, konkret əmələ keçmək, sülh müqaviləsini əngəlləyən maneləri aradan qaldırmaq lazımdır"
"Bütün təxribatlara görə, məsuliyyət Ermənistan siyasi hakimiyyətinin üzərinə düşür"
"Nikol Paşinyan hökumətinin hər addımda sülh müqaviləsindən danışması, ilk növbədə beynəlxalq ictimaiyyətdə erməni xalqının "sülhpərvər" imicini formalaşdırmaq, Azərbaycanı isə "sülhə mane olan tərəf" kimi tanıtmaq məqsədi daşıyır".
Bunu "Sherg.az"a açıqlamasında millət vəkili Nəsib Məhəməliyev deyib.
Deputat vurğulayıb ki, Nikol Paşinyan stabil mövqeyi olmayan, səhər dediyini axşam inkar edən siyasətçilərdəndir:
"Boş danışıqlardansa, konkret əmələ keçmək, sülh müqaviləsini əngəlləyən maneləri aradan qaldırmaq lazımdır. Konstitusiyadan Azərbaycanın ərazi bütövlüyünü şübhə altına alan maddələr çıxarılmalı, ATƏT-in Minsk qrupu buraxılmalı, üçüncü dövlətlərə məxsus hərbiləşdirilmiş qüvvələr sərhəddən çəkilməlidir. Eyni zamanda, Ermənistan ordusunda potensial təxribatçılar aşkar edilərək kənarlaşdırılmalıdır. Əks halda, təxribatların davam etməyəcəyinə heç kim qarant dura bilməz".
Parlament üzvü son günlərdə şərti sərhədlərdə baş verən təxribatlara da münasibət bildirib:
"Son zamanlar şərti sərhəddə mövqelərimizin atəşə tutulmasının intensiv xarakter alması bölgədə gərginliyin artırılması məqsədi daşıyır. Burada iki variant ola bilər. Birinci variant odur ki, Azərbaycana təzyiq vasitəsi kimi Ermənistan rəhbərliyinin birbaşa tapşırığına əsasən atəşkəs pozulur. İkinci variant isə təxribatların erməni ordusunda Paşinyan hakimiyyətini qəbul etməyən, keçmiş "Qarabağ klanı"na bağlı qüvvələr tərəfindən törədilməsidir. İstənilən halda bu, əvvəcədən planlaşdırılmış təxribatdır və məsuliyyət Ermənistan siyasi hakimiyyətinin üzərinə düşür".
