Azərbaycanda orta məktəblərdə daha çox hansı fənlər üzrə vakant müəllim yerinin olduğu açıqlanıb.
Təhsil Nazirliyindən verilən məlumata görə, 2020-2021-ci tədris ili üçün müəllimlərin iş yerinin dəyişdirilməsi müsabiqəsinə 7 539 vakant yer çıxarılacaq. Bu yerlərin 6 680-i tədrisi Azərbaycan dilində aparılan bölmə üzrədir.
Azərbaycan bölməsində ən çox vakant yer musiqi, daha sonra təsviri incəsənət müəllimliyindədir. Belə ki, musiqi fənni üzrə 1 421, təsviri incəsənət üzrə 788, rus dili üzrə 694, kimya üzrə 672, informatika üzrə 487, ingilis dili üzrə 453, texnologiya üzrə 318, riyaziyyat üzrə 309, biologiya üzrə 290, fiziki tərbiyə üzrə 287, fizika üzrə 275, Azərbaycan dili və ədəbiyyat üzrə 203, ibtidai sinif üzrə 167, coğrafiya üzrə 157, fransiz dili üzrə 13, alman dili üzrə 12 vakant yer var.
Rus bölməsi üzrə ən çox vakant yer ibtidai sinif üzrədir. Belə ki, müsabiqəyə ibtidai sinif üzrə 135, informatika üzrə 83, fiziki tərbiyə üzrə 66, musiqi üzrə 63 vakant yer çıxarılıb. Sözügedən bölmədə müəllimə tələbatın ən az olduğu fənlər fransiz və alman dili və tarixdir. Fransiz dili üzrə 9, alman dili üzrə 26, tarix üzrə 27 vakant yer var.
Bakı məktəblərində rus bölməsi üzrə 299, Azərbaycan bölməsi üzrə 395 vakant yer müsabiqəyə təqdim edilib. Bakıda Azərbaycan bölməsi üzrə ən çox vakant yer rus dili (91 yer), fiziki tərbiyə (60 yer), informatika (43 yer) fənlərindədir.
Paytaxt məktəblərində rus bölməsi üzrə 30 fiziki tərbiyə, 29 informatika, 28 ibtidai sinif müəlliminə ehtiyac var.
