Sabiq nazir Bakı Dövlət Universitetinə Məmməd Əmin Rəsulzadənin adının verildiyini və bu adı geri qaytarmaq lazım olduğunu söyləyib
Ali təhsil müəssisələrinin adlarında dəyişiklik edilməsi ilə bağlı təkliflər ictimaiyyətin və təhsil ekspertlərinin diqqət mərkəzindədir. Azərbaycan Dövlət Neft və Sənaye Universitetinin (ADNSU) rektoru Rüfət Əzizovun AzEdu.az Təhsil Portalına müsahibəsində ADNSU-nun gələcəkdə “AZİ Universiteti” adı ilə tanınmasının planlaşdırıldığını söyləməsi müzakirələri yenidən alovlandırıb. Məsələyə münasibət bildirən təhsil sahəsində tanınmış şəxslər universitetlərin tarixi və mədəni kimliyini əks etdirən adlarının qorunmasının vacibliyini vurğulayırlar. Keçmiş təhsil nazirləri və mütəxəssislər bəzi universitetlərin əvvəlki adlarına qaytarılmasının daha məqsədəuyğun olduğunu düşünürlər. Bu addımın milli dəyərlərin qorunması baxımından əhəmiyyət daşıdığını bildirirlər.
Keçmiş təhsil naziri, professor Firudin Cəlilov da mövzu ilə bağlı Sherg.az-a açıqlama verib:
"Bu məsələ keçirilən fənnlərlə bağlıdır. Orada işləyən kollektiv bunu məndən daha yaxşı bilir. Onların bu cür qərarı varsa, mən də buna normal baxıram. Keçmiş adlar klassik deyimə çevrilib. Onları dəyişmək doğru deyil. Ümumiyyətlə universitetlərin ilkin adlarını saxlamaq lazım idi".
Sabiq nazir Bakı Dövlət Universitetinə Məmməd Əmin Rəsulzadənin adının verildiyini və bu adı geri qaytarmaq lazım olduğunu söyləyib:
"UNEC-in keçmiş adı Narxoz idi. Narxoz bizim söz deyil. Buna görə də yalnız türk dilində olan keçmiş adlar qaytarılmalıdır".
