"Ukrayna cəbhəsində balans günü-gündən dəyişir. Kollektiv Qərb göründüyü qədəri ilə yoruldu. Həmçinin “Yordu-yordu” oyununun sonları yaxınlaşır və Putin Rusiyası daha diri görünür. Son aylarda gələn açıqlamalar da bunu göstərir".
Bu sözləri "Sherg.az"a AĞ Partiya sözçüsü, siyasi şərhçi Cavanşir Abbaslı Rusiya Ukrayna müharibəsindən danışarkən söyləyib.
O, bildirib ki, HƏMAS-İsrail savaşı başlayandan sonra Amerika başda olmaqla, Avropanın iri güclərinin diqqəti daha çox Yaxın Şərqə yönəlib:
"Bütün diqqətlər İsrailin Qəzza bölgəsində qələbə qazanmasındadır. Hətta bunun üçün kifayət qədər dəstək də verilməmiş deyil. Bir növ bu savaşın başlanmasından daha çox Zelenski Ukraynası ziyan görməyə başlayıb. Eyni zamanda HƏMAS İsrail müharibəsinin bitməsini gecə-gündüz arzu edirlər. Amma bu savaş qısa zamanda bitəcəkmi? Xeyr. Hələ bir müddət davam edəcək. İsrailin hücumlarına qədər göstərilən dirəniş bunu deməyə əsas verir. Xüsusilə, Fələstinə kifayət qədər dəstək də dünyanın bəzi ölkələri tərəfindən gəlməkdədir. Bu sırada Türkiyə, Rusiya kimi ölkələrin adlarını xüsusi vurğulamaq olar. Bunun üstünə London və digər Avropa şəhərlərində Fələstinə dəstək mitinqindəki kütləviliyi də gəlmək olar. Eyni zamanda, Avropanın qabaqcıl futbol çempionatlarının stadionlarında qaldırılan Fələstin bayraqlarını da unutmayaq. Bütün bunları ona görə deyirəm ki, artıq Rusiya-Ukrayna və HƏMAS-İsrail savaşı paralel getməkdədir. Bir növ bu savaşların bitməsi üçün biri digərindən asılı hala gəlib. Xüsusilə, Yaxın Şərqdəki savaş daha asılı durumda görünməkdədir”.
Partiya sözçüsü həmçinin, Kon Koflinin Qərb liderləri Qəzza zolağında “təslim olmağa” və Ukraynanın iki yerə bölünməsinə hazırdırlar fikirlərinə də aydınlıq gətirib.
Burada həqiqətlər görünür deyən siyasi şərhçi bildirib ki, zatən bu müharibənin toxumlarının səpildiyi 2014-cü ilin martından hər kəsə bəlli idi ki, kollektiv Qərbi Ukraynanın Qərbi, Rusiyanı isə Şərqi maraqlandırır:
" “Rus ayısı” istəyinə çatmış durumda görünür. Qərb isə elə əvvəlcədən niyyətinə çatıb. O baxımdan iki hissəyə parçalanma fikirlərində həqiqətlər görünür. Amma təbii ki, Ukrayna kimi bir ölkənin dövlətçiliyi süquta uğramayacaq. Sadəcə ölkə qarşı-qarşıya dayanan iki cəbhənin, yəni Rusiya və Qərbin təsir dairələrinə bölünəcək. Qəzza bölgəsində də savaş uzanacaqsa, sonunda yorulan Qərb dünyası olacaq. Bu tarix boyu belə olub. Əvvəl şirnikləşdirmə və sonunda meydanda tək buraxmaq onların bacardığı ən böyük ustalıqdır. Ukrayna cəbhəsində məğlubiyyət barədə dediyimiz məsələyə gəlincə isə, dünyada təbii ki, dəngələr çox dəyişəcək. Bu Rusiyanın daha da güclənməsi demək olacaq. Bununla Kreml iştaha gələrək dünyanın bir sıra yerlərində olan niyyətlərini həyata keçirməyə çalışacaq. Onunla yanaşı təbii olaraq, İran da dirçələcək. Bütün bunlar da bir çox ölkələr üçün arzuolunan deyil. Burada da ən böyük suçlu riyakar Qərb olacaq. Savaşdan keçən müddət ərzində Ukraynanın hava məkanı bağlanmadı, get-gedə edilən yardımlar azalmağa başladı, Qərb ölkələrinin liderlərinin hər biri müxtəlif “havalar çalmağa” səy göstərdilər. Təkcə son faktı deyək ki, Slovakiya NATO-ya müraciət edərək, Ukraynaya hərbi yardımı dayandırdığını bəyan edib. Bu tendensiya başqa ölkələrdə də müşahidə olunacaq. Litvanın xarici işlər nazirinin günlər öncə “Putin qələbəyə hazırlaşır” fikirləri də bir çox mətləblərdən xəbər verdi. Bu savaşda Qərbin mövqelərinin zəifləyəcəyi barədə fikirlər də doğru deyil. Heç bir yeni sistem də formalaşmayacaq. Çünki Amerika da daxil Qərb dövlətlərinin oturuşmuş sistemi mövcuddur. Ukrayna savaşında Rusiya qalib gəlsə belə, bu həmin sistemlərin dəyişməsinə, yaxud da yeni sistemlərin yaranmasına yol aça bilməz. Yekun olaraq bunu deyək bilərik ki, bu savaşda itirən bir tərəf var, o da ölkəsi viran olunmuş, on milyardlarla ziyan dəymiş, yüz mindən çox insan itkisi verən Ukraynadır”.
