Ermənistan-Azərbaycan sərhədlərinin delimitasiyası prosesi dalana dirənməyib. Bunu Ermənistanın Baş nazirinin müavini Mqer Qriqoryan deyib. Nikol Paşinyanın müavini bildirib ki, tərəflər növbəti görüşə hazırlaşsa da, onun dəqiq tarixi və formatı barədə razılaşma hələ ki yoxdur. O, həmçinin delimitasiyanın sərhədin hansı istiqamətində davam edəcəyini açıqlamayıb. M.Qriqoryanın sözlərinə görə, tərəflər növbəti görüşdə nəqliyyat kommunikasiyalarının açılması məsələsini də nəzərdən keçirəcək.
Siyasi şərhçi Azər Həsrət “Sherg.az”a vurğulayıb ki, Azərbaycanla Ermənistan arasında delimitasiya və demarkasiya prosesi uzun çəkən prosesdir:
“Çünki uzun illər münaqişə şəraitində qalan və ondan öncə SSRİ-nin işğalı altında olan iki dövlətin arasında sərhədlərin dəqiqləşdirilməsi çətindir. Nəzərə almaq lazımdır ki, Azərbaycan və Ermənistan arasında çox ciddi psixoloji gərginlik də var. Ermənilərlə bizim qarşılıqlı şəkildə işləməyimiz elə də asan məsələ deyil. Ona görə sərhəd məsələsinin tezliklə həll edilməsi gözlənilmir. Yəni məsələni tələsdirməyin də bir mənası yoxdur. Sözügedən proses qanunauyğun səviyyədə reallaşdırılmalıdır. Ermənistan tərəfinin belə açıqlama verməsi əslində Prezident İlham Əliyevin Qərbi Azərbaycana qayıdışla bağlı keçirilən beynəlxalq konfransa müraciətində də nəzərə çatdırıldı. İlham Əliyevin bütün çıxışlarında söyləyir ki, Azərbaycanla Ermənistan ikilikdə bütün məsələləri həll edə bilərlər. Üçüncü tərəflərin müdaxiləsi olmadan sərhəddin 12 kilometri ilə bağlı dəqiqləşdirmə işləri başa çatdırmışıq və bununla bağlı müsbət nəticələr var. Hesab edirəm ki, prosesi suni şəkildə surətləndirmək lazım deyil. Çünki bəlli bir müddətdən sonra işlər yavaş-yavaş yoluna düşəcək. Qırğızıstan-Tacikistan, Qırğısıztan-Özbəkistan və Qırğızıstan-Qazaxıstan-Özbəkistan arasında da delimitasiya və demarkasiya problemləri mövcuddur. Bəzən bunlar qanlı qarşıdurmalara qədər gətirib çıxarır. Bizim üçün önəmli olan hazırda şərti sərhəddə sakitliyin olmasıdır. Azərbaycan tərəfi prosesin təmkinlə aparılmasının tərəfdarıdır”.
