"Qrip Amerikadan başlanıbsa və Ümumdünya Səhiyyə Təşkilatı (ÜST) bu haqda raport veribsə, deməli, qripin konkret ştampından söhbət gedir”.
Bu barədə "Sherg.az”a Amerikada qrip xəstəliyindən baş verən kütləvi ölümlərin dünya üçün təhlükəsindən danışarkən tibb elmləri doktoru, professor Adil Qeybulla bildirib.
Həkimin sözlərinə görə, Azərbaycan ərazisində mütəmadi rast gəlinən, əhali arasında qrip adlandırılan xəstəlik əslində soyuqdəymə, kəskin respirator xəstəliklərdir:
"Yuxarı tənəffüs yollarının iltihabı ilə müşayiət olunan bu xəstəliklər iltihabi viruslardır. Amma qrip virusu Azərbaycana da gələ bilər. Bunların qarşısını almaq mümkün deyil. İnsanlar buna yoluxur, virusu ora-bura daşıyırlar. Amma profilaktik, təbliğatı tədbirlər, xəstəliyin yayılmasının qarşısını nisbətən alır. Kütləvi İnformasiya Vasitələri, elektron mətbuatda təbliğat aparılması, əhalinin maarifləndirilməsi əhəmiyyət daşıyır.
ÜSt-ün də bu xəstəliklərlə bağlı müvafiq tövsiyələri olur. Bütün bunlara əməl etməklə xəstəliyin yayılmasının qarşısını almaq olar. Ən problemli məsələ xəstələrin ağırlaşmasıdır. Qripdən ölüm halları, ciddi fəsadların baş verməsi əhalinin əmək qabiliyyətini itirməsinə səbəb olan faktorlardandır”.
Qeyd edək ki, ABŞ-da qripə görə son bir həftə ərzində 16 uşaq həyatını itirib. Bununla da oktyabr ayından indiyə qədər ABŞ-da qripdən ölənlərin sayı 53-ə yüksəlib. Xatırladaq ki, ABŞ-da 2010-cu ildən sonra ilk dəfə qriplə bağlı xəstəxanaya müraciət edənlərin sayında rekord artım qeydə alınıb. ABŞ hökuməti qriplə mübarizə üçün mümkün tədbirləri görsə də, müəyyən məqamlarda vətəndaşların öz sağlamlıqlarının qeydinə qalmaması ölüm hallarının yaşanmasına səbəb olub.
Aysel Aslan
