Xəbər verdiyimiz kimi, bir müddət öncə, Fransada projeriya (erkən yaşlanma) xəstəliyi ilə bağlı gen terapiyasına əsaslanan iki uğurlu klinik test həyata keçirilib. Və əlbəttə bu təşəbbüs projeriya xəstələrində böyük ümidlər yaradıb.
"Sherg.az” "lefigaro.fr”ə istinadən xəbər verir ki, fransız həkim və filosof Jorj Kanqilemin tədris etdiyi kimi, bədən üzvlərinin normal işləməsini kəşf etmək üçün insanın patologiyasını açmaq lazımdır:
"Heç şübhəsiz ki, projeriya - erkən yaşlanma xəstəliyi sayəsində bir gün daimi gəncliyin sirləri də öyrəniləcək. Bu dəhşətli xəstəlik nəticəsində insan bədəni bir il ərzində təxminən 7 il qocalır. Və uşaq təxminən 13-14 yaşına çatanda ürək-damar xəstəliklərindən dünyalarını dəyişirlər.
Biz də "Sherg.az” olaraq bu xəbəri əsas tutaraq Azərbaycanda da bu xəstəlikdən əziyyət çəkənlərin olub- olmaması, onların sayı və həmin xəstələrə göstərilən qayğı ilə maraqlandıq.
Bu məqsədlə Səhiyyə Nazirliyinin mətbuat xidmətinin mütəxəssisi Səfayə Əhmədova ilə əlaqə saxladıq. O bu barədə məlumatsız olduğunu bildirdi:
"Bu barədə bizdə dəqiq məlumat yoxdur. Yəqin, bizdə də belə xəstələr var. Amma sayları və digər məsələlərlə bağlı heç bir söz deyə bilmərəm”.
Qeyd edək ki, S. Əhmədovanın tövsiyəsi və dəstəyi ilə Endokrinoloji Mərkəzin direktoru Yusif İsmizadə ilə əlaqə saxladıq. O "Sherg.az”a açıqlamasında bunları vurğuladı:
"Bu cür xəstələr təbii ki, Azərbaycanda da var. Amma bizə müraciət etmirlər. Müraciət etmədiklərinə görə, statistika apara bilmirik”.
Sevda Ulutau
