Təhsil naziri Ceyhun Bayramov "Oxu günü” tədbirinin keçirilməsi haqqında əmr imzalayıb. Əmrə əsasən, hər il aprelin 23-də Ümumdünya Kitab və Müəlliflik Hüququ Günü münasibətilə respublikanın rayon və şəhərlərində ümumtəhsil müəssisələrinin iştirakı təmin olunmaqla kütləvi "Oxu günü” tədbiri keçiriləcək.
Əmrdə aprel ayını kitabın, mütaliənin təşviqi və təbliği istiqamətində görülən işlərə həsr etmək tövsiyə olunur. Bununla əlaqədar "Oxu günü” çərçivəsində tədbirlərə aprelin əvvəlindən başlamaq və bu tədbirləri aprelin 23-də keçiriləcək "Oxu günü” ilə yekunlaşdırmaq daha məqsədəuyğun hesab edilir.
Təhsil eksperti Etibar Əliyevin fikrincə, bu layihənin həyata keçirilməsi üçün kitab dünyası daim yenilənməlidir. Humanitar istiqamətdə ədəbiyyatların çapında müəyyən irəliləyiş olduğunu vurğulayan E.Əliyev deyib ki, təbiət elmləri sahəsində yeni ədəbiyyatların yazılması və çapında durğunluq hökm sürür:
"Dünyanın inkişaf etmiş ölkələrində bu iş paralel aparılır. Yaşlı və orta nəsil kitab oxumur. Ümid gənclərədir. Onları isə yalnız bədii ədəbiyyata yönləndirmək düzgün siyasət deyil. Təbiət elmlərinin, texnika və iqtisadiyyatın populyarlaşdırılması istiqamətində Qərb və Amerika alimlərinin minlərlə əsərləri çap olunub. Bu əsərlərin tərcümə olunması və təbliği olduqca vacibdir. Bədii ədəbiyyat oxumaq yaxşı haldır. Ancaq təfəkkürün hərtərəfli inkişafını təmin etmir.
Riyaziyyatçı, kimyaçı, fizik şeir yazmamalıdır. Öz sahələrində elmi-populyar kitablar yazsalar, ölkəyə daha böyük xeyir verə bilər. Gözlərini açıb dünya alimlərinə baxsalar, bunun yüzlərlə nümunəsinin şahidi olarlar”.
Şəymən
