"Cərrahi əməliyyat həyata keçirilməzdən əvvəl tibbi ləvazimatlar sayılmalı, əməliyyat bitdikdə, tikiş atılmazdan qabaq yoxlanmalıdır”.
Bu sözləri "Sherg.az”a həkim səhlənkarlığından danışarkən Azərbaycan Demokrat Partiyasının sədri, həkim Sərdar Cəlaloğlu deyib.
O vurğulayıb ki, əməliyyat ləvazimatları sayılmadan xəstənin yarası bağlanmamalıdır:
"Bəzən olur ki, həkim və ya tibb bacıları alətləri sayarkən səhv sayır, yaxud ümumiyyətlə sayılmayıb. Bu, həkim səhlənkarlığıdır.
Həkimin iki halda səhlənkarlığı olur; birincisi fəaliyyətsizlikdən yaranan, ikincisi yersiz fəaliyyətdən baş verən səhlənkarlıq. Yersiz fəaliyyət odur ki, bəzən şahidi oluruq ki, həkimlər lazım olmadığı vəziyyətdə müdaxilə edib, bir orqanı kəsmək əvəzinə, digərini kəsib. Bu kimi hallarda həkim məsuliyyət daşımalıdır”.
Qeyd edək ki, Sabirabadda bir il əvvəl əməliyyat edilən xəstənin bədənindən yad cisim çıxıb. Rayon Mərkəzi Xəstəxanasında uşaqlığından əməliyyat edilən Zeyniyeva Əsli son günlər qarın nahiyyəsindəki küt ağrılar səbəbindən Respublika Kliniki Xəstəxanasına müraciət edib. Müayinə zamanı məlum olub ki, qadının bədənində əməliyyatdan sonra tənzif parçası qalıb. Zeyniyeva Əslini Bakıda əməliyyat edən həkim Pənah Hüseynov bildirib ki, qadının kor bağırsaq nahiyyəsində aşkarlanan tənzif uzun müddət orada qaldığından çürüyərək bağırsağa da mənfi təsir göstərib.
Aysel Aslan
