Rusiya Liberal Demokrat Partiyasının (LDPR) lideri, dumanın vitse-spikeri Vladimir Jirinovski İrəvanı təhqir edib. O, dumasında Ermənistan vətəndaşlarının Rusiyaya gəlməsi barədə ikitərəfli müqavilənin müzakirəsi zamanı bildirib ki, bu müqavilə Rusiyaya gələn cinayətkarların sayının artması deməkdir:
"Rusiya çoxmillətli ölkədir. Burda gəlmələr elə də tanınmır. Sazişi təsdiq etməzdən öncə, bəlkə bir özümüzə sual verək - bu, bizim ölkəyə gələn cinayətkarların sayını artırmayacaq ki?”. Jirinovskinin açıqlamasından xəbər tutan Ermənistan mətbuatı dərhal özündən çıxıb. Və LDPR liderini riyakarlıqda ittiham edib.
Partiya liderinin bəyanatını şərh edən Dövlət İdarəçilik Akademiyasının Siyasi Araşdırmalar İnstitutunun direktoru, siyasi elmlər doktoru, politoloq Elman Nəsirli "Şərq”ə açıqlamasında qeyd edib ki, Jirinovski hansı millətin nə ilə məşğul olmasına dair geniş informasiyaya malikdir: "O, ermənilərin Rusiya ərazisində törətdikləri cinayətlərin həddindən çox olmasını nəzərə alaraq, belə fikirlər səsləndirib. Etiraf edək ki, Jirinovski Bakıda olarkən ölkəmiz barədə həqiqətlərə öz gözləri ilə şahidlik etdi. Azərbaycanda çoxsaylı rus məktəblərinin olduğunu və onların çox yüksək səviyyədə fəaliyyət göstərdiyini gözü ilə gördü. Bu səbəbdən düşündü və belə qənaətə gəldi ki, vaxtilə Azərbaycanın əleyhinə irəli sürdüyü fikirlərin real əsası yox imiş. Jirinovski yaxşını pisdən fərqləndirməyə başlayıb”.
Ekspertin sözlərinə görə, vitse-spikerin mesajı Ermənistanda ajiotaja səbəb olub: "Bədnamlar çox gözəl anlayırlar ki, Jurinovski belə fikirlərlə çıxış edirsə, bu, artıq erməni miqrantlara qarşı fəaliyyətin genişlənməsi ilə müşayiət olunacaq. Təşkilat liderinin açıqlaması Azərbaycanın mövqelərinə uyğundur. Düşmən tərəfin adı cinayətdə çox hallanırsa, bu o deməkdir ki, Azərbaycan cinayətkarlarla üz-üzə dayanıb. Onun hədəfinə çevrilib. Jirinovskinin addımı ölkəmizin müdafiəsi anlamında qəbul edilə bilər”.
Ayyət Əhməd
