Bilgəh-Buzovna yolunda ağır yol-nəqliyyat hadisəsi baş verib. Sherg.az Oxu.Az-a istinadən xəbər verir ki, "Azsamand” markalı avtomobil qadını vurub. Qadın hadisə yerində ölüb. Bildirilir ki, qadın taksidən düşərkən vurulub.
Baş verən yol-nəqliyyat hadisəsinin bəzi təfərrüatı məlum olub. Qəza nəticəsində dünyasını dəyişən qadının qızının yaxın günlərdə toyu olmalı idi. Hadisə şahidləri bildiriblər ki, qadın maşının sol qapısından düşdüyü zaman onu digər avtomobil vurub. Qəza zamanı qadını ünvan başına gətirən taksinin sürücüsü də yüngül xəsarət alıb.
"Anam işdən qayıdırdı. Məhərrəm ayı başa çatandan sonra toyum olmalı idi. Hamı toya hazırlaşırdı, amma yas düşdü”, - qadının qızı deyib.
Daxili İşlər Nazirliyi yol-nəqliyyat hadisəsi ilə bağlı məlumat yayıb. Nazirliyin mətbuat xidmətindən bildirilib ki, noyabrın 1-də saat 19 radələrində Xəzər rayonunun Buzovna qəsəbəsi ərazisində Bakı şəhər sakini Bəxtiyar Ağayev idarə etdiyi "AzSamand” markalı avtomobillə yolun kənarında dayanmış həmyerlisi Coşqun Zeynallının idarə etdiyi "Mercedes” markalı avtomobili və həmin vaxt avtomobildən düşən sərnişin - paytaxt sakini Elmira Haşımovanı vurub. Nəticədə qadın hadisə yerində ölüb. Xəzər RPİ tərəfindən araşdırma aparılır.
