Büdcədə
artım nəzərdə tutulub
Maliyyə Nazirliyi 2024-cü ilin dövlət və
icmal büdcələrinin ilkin göstəricilərinə dair açıqlama yayıb. İlkin proqnozlara
əsasən, gələn il dövlət büdcəsinin gəlirləri 33 milyard 765 milyon, xərcləri isə
36 milyard 355 milyon manat olacaq.
Bəzi mənbələrdə həmin göstəricilərin 2023-cü
ilin təsdiq olunmuş proqnozlarına nisbətən, müvafiq olaraq, 0.4 faiz və 0.7
faiz az olduğu qeyd olunub.
Neftin qiyməti isə 1 barelə görə 60 dollar həddində
müəyyən edilib. Bu məbləğdə dəyişiklik yoxdur.
Millət vəkili Vüqar Bayramov isə sosial media
hesabında yazıb ki, gələn ilin dövlət büdcəsindən sosial müdafiə və sosial təminat
üzrə xərclərdə artım nəzərdə tutulub.
Onun sözlərinə görə, bu, 2024-cü ildə sosial təminatın daha da güclənəcəyindən
xəbər verir:
“Müvafiq sahələrə ayrılan vəsaitlərin həcminin artırılmasının ən əsas
hədəfi Azərbaycan vətəndaşlarının sosial rifahının yüksəldilməsinə xidmətdir.
Belə ki, gələn il birbaşa sosial müdafiə və sosial təminat xərcləri 5 faiz
artırılaraq 4 milyard 542 milyon manata çatdırılacaq. Qeyd edək ki, bu rəqəm
birbaşa sosial xərclərdir. Bütövlükdə sosial istiqamətli xərclər isə 36 milyard
355 milyon manatlıq büdcə xərclərinin 45 faizindən çoxunu təşkil edəcək.
Sosial istiqamətdə daha çox vəsaitlərin nəzərdə
tutulması gələn il sosial proqramlara ayrılan vəsaitin artırılacağından xəbər
verir. Növbəti yanvardan etibarən bütün növ əmək pensiyaları indeksasiya
olunaraq artırılacaq. Digər sosial istiqamətlərdə də təminatın güclənəcəyi gözlənilir”.
