Ermənistan hələ bir neçə il məsələnin həlli haqqında siyasi iradə nümayiş etdirməyəcək
2025-ci ildə Azərbaycan və Ermənistan arasında sülh müqaviləsi imzalana bilər.
Bunu Ermənistan xarici işlər nazirinin müavini Paruyr Ovannisyan deyib.
“İl ərzində sülh müqaviləsinin imzalanmasını mümkün hesab edirik, buna görə də səylərimizi davam etdiririk. Son zamanlar həm baş nazir, həm də xarici işlər naziri bu proseslərə toxunub. Burada bircə onu təsdiq edə bilərəm ki, həqiqətən də sülh sazişinin yekunlaşdırılmasına çox yaxınıq”, - nazir müavini bildirib.
Həmçinin Ovannisyan qeyd edib ki, delimitasiya prosesinin irəli aparılması üçün də müsbət dinamika var:
“Kommunikasiyaların (nəqliyyat yollarının) açılması ilə bağlı yanaşmalarımız da konstruktivdir, bunlar sabit sülhə nail olmaq məqsədi daşıyır”.
Politoloq Sahil Kərimli "Sherg.az"a bildirib ki, Ermənistan siyasi rəhbərliyinin son günlər bir-birinə zidd reallıqdan uzaq verdiyi açıqlamalar sülh müqaviləsi danışıqlarına ciddi zərbələr vurur:
"Ermənistan bu kimi fikirlərlə dünya ictimaiyyətini manipulyasiya etməyə və çaşdırmağa çalışırlar. Lakin reallıqda rəsmi İrəvanın sülh prosesinə konkret mane olduğunu görürük. Həmçinin bu istiqamətdə real və əməli addımlardan çox uzaqda olduğunun şahidi oluruq. Eyni zamanda Azərbaycanın haqlı və ədalətli tələbləri var. Sülh müqaviləsi o zaman imzalana bilər ki, Ermənistan ərazi iddialarından rəsmi şəkildə vaz keçməlidir. Üstəlik, konstitusiyasında dəyişiklik etməlidir. Bütün bunlarla yanaşı, Ermənistan ATƏT-in Minsk qrupunun ləğvi ilə bağlı müraciətdə də bu gün qeyri-konstruktiv mövqe nümayiş etdirir. Məhz 2020-ci ilin 10 noyabr bəyannaməsində İrəvan Zəngəzur dəhlizinin açılması barədə öz üzərinə öhdəlik götürsə də, indiyə kimi yerinə yetirmir. Lakin bu, Azərbaycanın əsas tələblərindəndir. Hansı ki, ölkəmizin bir hissəsi ilə digər hissəsini - Naxçıvanı birləşdirəcək maneəsiz yolun çəkilməsi əsas hədəflərdən biridir".
Politoloq vurğulayıb ki, Ermənistan heç də sülh müqaviləsi imzalamaq istəmir:
"Əgər bunun əksi olsaydı, ABŞ və digər Qərb ölkələri ilə hərbi əməkdaşlıq sahəsində addımlar atmazdı. Xüsusilə də, Avropa İttifaqının "missiyasının" fəaliyyətinin 2027-ci ilə qədər uzadılmasına razılıq verməzdi. Ermənistan hələ bir neçə il məsələnin həlli haqqında siyasi iradə nümayiş etdirməyəcək. Ümumilikdə qarşıdakı dövrdə iki ölkə arasında sülhün imzalanması mümkün görünmür".
