Gürcüstan parlamenti ABŞ Nümayəndələr Palatasının dəstəklədiyi “MEGOBARI Aktı”na cavab olaraq xüsusi bəyanat qəbul edəcək.
APA-nın Tbilisi müxbiri xəbər verir ki, bu barədə parlamentin spikeri Şalva Papuaşvili bildirib.
Onun sözlərinə görə, parlamentin sədrinin, “Gürcü Arzusu” fraksiyasının liderlərinin, həmçinin parlamentdəki siyasi qrupların təşəbbüsü ilə hazırlanmış layihə artıq parlamentə təqdim olunub və baxılması üçün Xarici Əlaqələr Komitəsinə göndərilib. Onun müzakirəsi sabahkı sessiyanın gündəliyinə salınıb.
"Bu gün ictimaiyyət Baş nazirin ABŞ prezidentinə məktubunu gördü. Bu məktub digər məsələlərlə yanaşı, "MEQOBARI Aktı”na da aiddir. Eyni zamanda, parlament fraksiyasının və siyasi qrupların iştirakı ilə bu "MEQOBARI Aktı”na aid olan parlament bəyanatı hazırlanıb. Bəyanatda bu aktla bağlı qiymətlərimiz və cavabımız öz əksini tapıb. Bəyanatda "MEGOBARI Aktı”nın (“Dost” aktı) adı da dəyişdirilib. Orada gördüklərimiz dostluqdan başqa hər şey idi. Bu, təkcə yalan faktlara əsaslanmır, həm də mahiyyətində Gürcüstanda mövcud olan reallığın təhrifidir. Məqsədimiz hər kəsə reallığın nə olduğunu göstərmək və arqumentlərə və sərt faktlara əsaslanaraq qiymətləndirməmizi etməkdir” - deyə Şalva Papuaşvili bildirib.
