Su böhranına görə ən az məsuliyyət daşıyanlar ən çox əziyyət çəkənlərdir.
"Report" xəbər verir ki, bunu Böyük Britaniyanın ətraf mühit naziri Meri Kriq COP29 çərçivəsində keçirilən “İqlim, təbiət və insanlar üçün suyun həyat xəttini qeyd edirik” adlı tədbirdə deyib.
Onun sözlərinə görə, iqlim və təbiət böhranı su böhranıdır və insanların əksəriyyəti iqlimin təsirini su vasitəsilə hiss edir: “Buna görə ən az məsuliyyət daşıyanlar ilk və ən çox əziyyət çəkənlərdir. Təxminlərə görə, iqlim dəyişikliyinin təsirləri səbəbindən köçkün düşən hər beş nəfərdən dördü qadın və qızlardır"..
O xatırladıb ki, 1970-ci ildən bəri vəhşi təbiət populyasiyaları 69 % azalıb: “Bu əsasən şirin su növlərinin 83 % azalması ilə bağlıdır. Daha əvvəl deyildiyi kimi, 2023-cü il son 30 ilin çaylar üçün ən quraq ilini müşahidə etdik. Bunun nəticələri dərin və iqtisadi cəhətdən əhəmiyyətlidir. Ərzaq sistemlərinə, nəqliyyata və təmiz enerji istehsalına təsirinin miqyasını görmək mümkündür. Bu gün Birləşmiş Krallığın COP29 Su Bəyannaməsini dəstəklədiyini məmnuniyyətlə elan edirik. Biz bunu tam dəstəkləyirik”.
M. Kriq bildirib ki, Birləşmiş Krallıqda çayların, göllərin və dənizlərin təmizlənməsi əsas prioritetdir: “Bu asan məsələ olmasa da, həllər var. Birləşmiş Krallığın "Su təhlükəsizliyi üçün ədalətli keçidlər" proqramı vasitəsilə biz ölkələrə su ilə əlaqəli iqlim dəyişikliyinə qarşı davamlılığı artırmağa kömək edirik. Belə ki, Braziliyadan Malaviyə, Misirdən Nepala qədər ölkələr ərzaq, su və enerjini öz iqlim, təbiət və inkişaf planlarına inteqrasiya edirlər. Eyni zamanda, Nigeriya, Laosda maraqlı tərəflər dayanıqlı su idarəçiliyi vasitəsilə investisiyaları yönləndirən və bazar islahatları aparmaq üçün birlikdə çalışırlar. Bununla yanaşı, bizim dəstəyimizlə Peru özünün tətbiq planını tamamlayır, özəl sektor və vətəndaş cəmiyyəti ilə birlikdə hesabatlılığı təmin etmək və suyun səmərəli istifadəsini biznes normasına çevirmək üçün işləyir. Birləşmiş Krallıq bu vacib işi öz üzərinə götürməkdən qürur duyur".
