İqtisadiyyat Nazirliyi tərəfindən təqdim olunmuş makroiqtisadi proqnozlarda 2026-2029-cu illər üzrə manatın ABŞ dollarına qarşı məzənnəsi sabit, cari ilin səviyyəsində götürülüb.
Bu barədə Maliyyə Nazirliyi xəbər verib.
Qeyd edilib ki, proqnozlara əsasən ortamüddətli dövrdə əhalinin gəlirlərinin artaraq 2029-cu ildə 123 milyard manata, xərclərinin isə 119,4 milyard manata qədər yüksəlməsi gözlənilir.
Millət vəkili Vüqar Bayramov “Sherg.az”a söyləyib ki, Azərbaycan üzən məzənnə rejiminə keçmədiyi üçün manatın məzənnəsi birbaşa Mərkəzi Bankın mövqeyindən asılı olaraq müəyyənləşir:
“Təbii ki, Mərkəzi Bank növbəti dövrlərdə də manatın məzənnəsinin müəyyənləşdirilməsində həlledici mövqeyini qoruyub saxlayacaq. Amma manatın məzənnəsinə təsir göstərən amillər sırasında neftin dünya bazar qiyməti əsas faktorlardan biridir. Belə ki, neftin dünya bazar qiymətindəki dəyişiklikləri nəticə etibarilə ölkəyə daxil olan valyutanın həcminə təsir göstərir. Mərkəzi Bankda tədiyyə balansındakı vəziyyət, eləcə də neftin dünya bazar qiymətinin dəyişməsini nəzərə alaraq məzənnə siyasətini həyata keçirib. Bu baxımdan da növbəti dövrdə neftin bazar qiyməti bütövlükdə ölkəyə daxil olan valyutanın həcminə təsir göstərdiyi üçün gözlənilir ki, bu, məzənnə siyasətində də nəzərə alınan əsas faktorlardan biri olaraq qalacaq. Amma Mərkəzi Bankın mövqeyi həlledicidir. Mərkəzi Bankın qərarlarından asılı olaraq məzənnə siyasəti həyata keçirilib. Növbəti dövrdə də Mərkəzi Bank manatın dollara nisbətən məzənnəsinin müəyyənləşdirilməsindəki mövqeyini qoruyub saxlayacaq. Mərkəzi Bankın məzənnə siyasəti ilə bağlı açıqlamalar da ondan xəbər verir ki, tədiyyə balansının vəziyyəti və eyni zamanda, ölkəyə daxil olan valyutanın həcmi Mərkəzi Bankın qərarlarına təsir göstərən əsas faktorları olaraq qalmaqdadır”.
