Londonda qeyri-qanuni mühacirlərin məskunlaşdığı Thistle City Barbican oteli yandırılıb.
Teleqraf xəbər verir ki, hadisə ilə bağlı bir nəfər həbs edilib.
“Polis əməkdaşları başqalarının həyatına təhlükə törətmək məqsədi ilə yanğın törətməkdə və qanunsuz kəsici-deşici əşya saxlamaqda şübhəli bilinən 64 yaşlı kişini saxlayıblar”, - deyə məlumatda bildirilir.
Sentyabrın 24-ü axşam saatlarında baş verən insident nəticəsində xəsarət alan olmayıb. Fövqəladə hallar xidməti gələnə qədər yanğın otel işçiləri tərəfindən söndürülüb. Polis hadisəni nifrət cinayəti kimi qiymətləndirir.
Son həftələr Böyük Britaniyada sənədsiz miqrantların vergi ödəyicilərinin hesabına saxlanılan otellərdə yerləşdirilməsinə qarşı nümayişlər keçirilib. Etiraz dalğası iyulun ortalarında İngiltərənin şərqindəki otellərdən birində qalan 38 yaşlı efiopiyalı qaçqının 14 yaşlı qıza cinsi təcavüzündən sonra başlayıb. Sentyabrın 23-də o, bir il müddətinə azadlıqdan məhrum edilib.
Böyük Britaniyada qeyri-qanuni immiqrasiya problemi ölkənin Avropa İttifaqından çıxmasından sonra daha da pisləşib.
