Son günlər Türkiyənin bəzi media qurumlarında və sosial şəbəkələrdə Azərbaycanla bağlı mütəmadi dezinformasiya xarakterli xəbərlər yayılıb.
Türkiyə hökumətindəki mənbə bu məsələnin Türkiyənin rəsmi dairələri tərəfindən araşdırıldığını bildirib.
“Artıq bununla bağlı araşdırma və təhlillər aparılır. Azərbaycan tərəfi ilə də məsələ üzrə fikir mübadiləsi aparılıb. Bu cür xəbərlərin yayılması Türkiyə-Azərbaycan qardaşlıq münasibətlərinə zərər verə bilməyəcək qədər kiçik nüanslardır”, - mənbə qeyd edib.
Qeyd edək ki, Türkiyənin bəzi media orqanları son günlər Azərbaycanla bağlı mütəmadi olaraq dezinformasiya xarakterli məlumatlar yayırlar. Bu məlumatlar daha sonra sosial şəbəkələrin Türkiyə seqmentində müzakirə olunur.
Xatırladaq ki, Türkiyənin Azərbaycandakı səfirliyinin mətbuat müşaviri Alptekin Cihangir İşbilir qeyd edib ki, onlar Türkiyə-Azərbaycan Media Platformasının inkişafı və proseslərdə daha çox yer alması üçün çalışırlar. “Türkiyə-Azərbaycan əlaqələrini pozmağa çalışan daxili və xarici qüvvələrə qarşı mübarizə aparacağıq. Qarşılıqlı danışıqlar aparılmalıdır və bu qüvvələrlə mübarizə aparılmalıdır. Daha da bir-birimizə bağlanmalıyıq. Boşluq buraxmayacağıq ki, araya girən olmasın. Azərbaycan-Türkiyə münasibətlərini pozmağa çalışan daxili və xarici qüvvələrin oyunlarına gələnlər də var. Amma buna qarşı daha sıx birləşməliyik”, - Alptekin Cihangir İşbilir vurğulayıb.
Türkiyənin Azərbaycandakı keçmiş səfiri, “İMZA” Sosial İnkişafa Dəstək İctimai Birliyinin Türkiyədəki nümayəndəsi Hulusi Kılıç Sherg.az-a bildirib ki, iftira, yalan, böhtan, pis niyyət və düşmən hisslərlə yayılan xəbərlər Türkiyə–Azərbaycan qardaşlığını sarsıda bilməz:
"Türkiyə–Azərbaycan qardaşlığı dağ kimidir, heç kəs onu silkələyə bilməz. Azərbaycanın Fələstin və Qəzza üçün etdikləri hamıya məlumdur. Rəsmi Bakı 1992-ci ildə Fələstini tanıyıb. 2010-cu ildə isə Bakıda Fələstin səfirliyi açılıb. Mən həmin dövrdə Azərbaycanda səfir idim. Bu ölkənin Fələstin səfirliyi üçün göstərdiyi yardımların şahidi olmuşam. Bundan başqa, 3 il öncə Azərbaycan Ramallahda diplomatik nümayəndəlik açdı. Qəzza ilə bağlı isə üzərinə düşən hər bir işi görüb. Ankaranın iştirak etdiyi bütün qərarlarda Bakı da iştirak edib, mövqeyini ortaya qoyub. Bir müddət əvvəl Türkiyədəki bəzi satqın çevrələr SOCAR-ın İstanbul ofisinə hücum etmişdilər. O vaxt mən bunu ən kəskin şəkildə qınamışdım. Haradan qaynaqlandığı bəlli olmayan, xaricdən qidalanan bu xəyanətkar çevrələrə demək istəyirəm ki, onların buradan bir şey qazanması mümkün deyil. Çünki biz bir millətik. Lazım gəldikdə də bir dövlət kimi hərəkət edirik. Şuşa Bəyannaməsi bunun ən gözəl sübutudur. Türküstan, Qazaxıstan, Özbəkistan, Qırğızıstan bizim qardaşlarımızdır, amma Türkiyə ilə Azərbaycan əkiz qardaşdır. Heç bir xarici təsir bu qardaşlığı sarsıda və poza bilməz".
Sabiq səfir əlavə edib ki, xarici qüvvələr yalan kampaniyalarının puça çıxdığını görəcəklər:
"Üstəlik, onların məqsədləri də aydındır: Bir tərəfdən BMT Baş Assambleyası çərçivəsində həm Azərbaycanın, həm də Türkiyənin Nyu-Yorkda apardığı uğurlu təmasları kölgə altına salmaq, digər tərəfdən isə gələn həftə Qəbələdə keçiriləcək Türk Dövlətləri Təşkilatının zirvəsini gözdən salmaqdır. Amma mən bir söz deyirəm: "it hürər, karvan keçər"".
