Ermənistanın KTMT-yə borcu ola və onu iki il ödəməyə bilər, indi 2024-cü il üçün borc var, müddəti 2025-ci ilin sonunda başa çatacaq. Bunu Rusiya XİN rəhbərinin müavini Aleksandr Pankin deyib. O bildirib ki, Ermənistan bu borcu iki il ödəməyə bilər. Əlavə müvafiq qərarlar qəbul ediləcək. KTMT-nin istənilən üzvü borclana bilər. Elə hallar olub ki, başqa ölkələr də borclanmağa məcbur olub.
Siyasi şərhçi Elmir Səftərov “Sherg.az”a söyləyib ki, Nikol Paşinyan Ermənistanın Rusiyadan uzaqlaşmasını Kollektiv Təhlükəsizlik Müqaviləsi Təşkilatının (KTMT) Qarabağda savaşmaması ilə əlaqələndirir:
“Rusiya Prezidenti Vladimir Putin isə noyabrın sonunda Ermənistan-KTMT əməkdaşlığı ilə bağlı verdiyi açıqlamalarda müdaxilənin yalnız ölkəyə xarici təcavüz edilməsi zamanı ola biləcəyini ifadə etmişdi. Rusiyanın söz sahibi olduğu hərbi təşkilatdan uzaqlaşmaqla bərabər, Ermənistan baş naziri Nikol Paşinyan Avrasiya İqtisadi Birliyi (AİB) sammitinə də ev sahibliyi etməyəcəyini təsdiqləyib. Təbii ki, Ermənistanın bu addımı Rusiya ilə əlaqələri tamamilə kəsdiyi anlamına gəlməsə də, başı Ukraynadakı savaşa qarışan, həmçinin Yaxın Şərqdə nüfuzu zədələnən Moskvadan daha çox mənfəət və güzəştlər əldə etmək niyyəti də ola bilər”.
Ekspert qeyd edib ki, ümumilikdə V.Putinin fikirləri, daha sonra Nikol Paşinyanın KTMT-də açıq şəkildə narazılıq ifadə etməsi artıq dərinləşib və ciddi məsələ kimi görünsə də, Rusiya sakitdir və İrəvanın təhlükəsizliyini KTMT-dən başqasının təmin etməyəcəyini inandırmağa çalışır:
“Misal olaraq da Qərbi Ukraynanın indiki vəziyyətə gəlməsində səbəbkar göstərir. Amma bu situasiya Ermənistanın KTMT-yə qayıtmasını artıq getdikcə çətinləşdirir, hətta mümkünsüz edir. Təşkilatda iştirak etməsə də, KTMT-yə borcu olan İrəvan düşünür ki, Rusiya Ermənistana çatdırılmayan silahlara görə ödədiyi vəsaitin bir hissəsini keçə bilər.
Bundan əlavə, Qərbin Rusiyanın aktivlərini dondurub müsadirə etməsi fonunda Ukraynada apardığı müharibə Moskvanın KTMT-yə borcu olan Ermənistana münasibətdə təzyiq göstərməsini təxirə salır”.
