Ermənistan Fransa və Hindistandan aldığı silahlara güvənməməlidir
Garo Paylanın “Ermənistana verilmiş silahlar geri qaytarılmalıdır” bəyanatı, bəzi müşahidəçilər tərəfindən Ermənistanın siyasi strategiyasının bir hissəsi kimi qiymətləndirilir. Bu strategiya, vaxt qazanmaq, silahlanmanı artırmaq və gələcəkdə mümkün hərbi əməliyyatlara hazırlıq məqsədi daşıya bilər. Bu, Ermənistanın silahlanma siyasətində davamlılığın göstəricisi kimi qəbul edilə bilər. Paşinyan hökuməti beynəlxalq dəstək üçün əvvəlcə ABŞ-ın Bayden administrasiyasına və Fransaya güvənirdi. Hazırda isə əsas ümidini Fransa Prezidenti Emmanuel Makrona bağlayır. Paşinyanın ABŞ-a səfəri zamanı ciddi müzakirələrin və ya Prezident Donald Trampla görüşün baş tutmayacağı gözlənilir. ABŞ-dan sonra onun Fransaya səfər edərək, Makronla Azərbaycana qarşı planları müzakirə edəcəyi ehtimal olunur.
Bu kontekstdə, Azərbaycan Prezidenti İlham Əliyevin Ermənistana verilən silahların geri qaytarılması tələbi yenidən gündəmə gəlir. Əliyev, bu silahların müharibəyə hazırlıq məqsədi ilə alındığını və onların qaytarılmamasının regionda yenidən müharibə təhlükəsi yaratdığını vurğulayırdı. Azərbaycan, belə bir təhlükənin qarşısını almaq üçün qətiyyətli mövqe sərgiləyir və buna imkan verməyəcəyini bəyan edir. Nəticə etibarilə, Ermənistanın silahlanma siyasəti və beynəlxalq dəstək axtarışları, regionda gərginliyin artmasına səbəb ola bilər. Azərbaycan isə öz təhlükəsizliyini təmin etmək üçün zəruri tədbirlər görməyə hazır olduğunu bildirir.
Politoloq Zeynal Əmrəliyev “Sherg.az”a söyləyib ki, Garo Paylan kifayət qədər ziddiyətli şəxsdir və kürd partiyaları tərəfindən uzun müddətdir Türkiyədə təmsil olunur:
“Yəni Paylan radikal kürd partiyalarının nümayəndəsi olaraq çıxışlar edir. Verdiyi açıqlamalarda əsasən Ermənistanın mövqeyini dəstəkləyir. Onun bu yaxınlarda səsləndirdiyi fikirlər şübhəsiz ki, Ermənistanın revanşist qüvvələrinin ideologiyasına xidmət göstərir. Paylan faktiki olaraq Türkiyə parlamentinin deputatı olmasına baxmayaraq, erməni kilsəsinin və diasporunun ağzıyla danışır. Onun bəyanatları heç də xoş hal deyil. Əvvəllər Nikol Paşinyan hakimiyyətində təmsil olunan nümayəndələr də bu barədə açıqlamalar verdilər. Ermənistan parlamentinin deputatlarından biri söyləmişdi ki, biz yenidən güc əldə etməyə çalışırıq və Azərbaycandan öz intiqamımızı alacayıq. Paylan bildirir ki, güclənib yenidən torpaqları azad olunması istiqamətində addımlar atılacaq. Birincisi Ermənistanın savaşa başlamaq üçün kifayət qədər insan resursları yoxdur. 44 günlük müharibə dövründə Ermənistan ordusunda olan-qalan şəxsi heyəti də sıradan çıxıb. Savaşdan sonra Azərbaycan Ordusunda yeni korpusların yaradılmasının şahidi olduq. Ermənistanda isə hərbi qüvvələrin sayının azaldılması prosesi getdi. Ermənistan Fransa və Hindistandan aldığı silahlara güvənməməlidir”.
