Fransa Birləşmiş Millətlər Təşkilatı çərçivəsində keçirilən “Fələstin məsələsinə həll tapılması və iki dövlətli həllin həyata keçirilməsi” mövzusundakı Yüksək Səviyyəli Beynəlxalq Konfransda Fələstin dövlətini tanıyacağını açıqlamağa hazırlaşır. Hökumətin bu qərarını dəstəkləyən bələdiyyələr binalarına Fələstin bayrağı sancıblar.
Sherg.az xəbər verir ki, Nantes, Stains və Saint-Denis də daxil olmaqla 21 bələdiyyə Daxili İşlər Nazirliyinin qadağasına baxmayaraq binalarına Fələstin bayrağı asıb.
Sosialist Partiyasının (PS) Baş Katibi Olivye For ABŞ mərkəzli X sosial media platformasında ötən həftə yazdığı açıqlamada Fransanın 22 sentyabrda Fələstin Dövlətini tanıyacağını bildirərək “bələdiyyələrdə Fələstin bayraqlarının dalğalanması” çağırışı etmişdi.
Fransada istefa vermiş hökumətin daxili işlər naziri Bruno Retailleau isə belə bir addımın dövlət qurumlarının əməl etməli olduqları “neytrallıq prinsipinə” zidd olduğunu bildirərək, valilərdən Fələstin bayrağı asan bələdiyyələri şikayət etmələrini istəyib.
Paris bələdiyyə başçısı Ann İdalqo ABŞ mərkəzli Bluesky sosial media platformasında Eyfel qülləsinin fotosunu paylaşaraq “Paris, Fələstin Dövlətinin tanınması üçün Fransa Prezidenti Makron tərəfindən BMT-yə təqdim olunan təşəbbüsü dəstəkləyir” deyib.
İsrail və Fələstin bayraqlarının birlikdə işıqlandırıldığı Eyfel qülləsi fotosunu paylaşan İdalqo iki dövlətli həll yolundan keçən sülhün tərəfdarı olduqlarını vurğulayıb.
Digər tərəfdən, Daxili İşlər Nazirliyi bələdiyyələrə Fələstin bayrağı asmağı qadağan etdiyi halda, Fransanın ən məşhur turistik simvollarından biri olan Eyfel qülləsinə Fələstin bayrağının İsrail bayrağı ilə yanaşı işıqlandırılması da birmənalı qarşılanmayıb.
