Məsud Pezeşkian ölkələrimiz arasındakı münasibətlərin səhmana salınmasında maraqlı görünür
İran prezidenti Məsud Pezeşkian Azərbaycana səfər etməzdən öncə AzTV-yə müsahibəsində Zəngəzur dəhlizi ilə bağlı düşüncələrini belə ifadə edib. Prezident bildirib ki, İran öz ərazisindən Azərbaycanın əsas hissəsi ilə Naxçıvana yol verir və bununla bağlı işlər görülüb, razılaşma var: "İran tərəfi düşünür ki, Ermənistanın Azərbaycana yol verməsi onun beynəlxalq hüquqlarını, ərazi bütövlüyünü pozmursa, problem yoxdur".
Milli Cəbhə Partiyasının sədr müavini Tural İrfan "Sherg.az"a açıqlamasında deyib ki, İranla münasibətlərin istiləşməsi həm ölkələrimiz üçün, həm də region üçün önəmlidir. Ekspert qeyd edib ki, İran prezidentinin Azərbaycana səfəri bu əlaqələrin inkişafı üçün gözəl fürsətdir:
"Hesab edirəm ki, İran prezidenti Məsud Pezeşkian ölkələrimiz arasındakı münasibətlərin səhmana salınmasında maraqlı görünür. Zəngəzur dəhlizi məsələsində də İranın yumşalması müşahidə olunur. Şübhəsiz ki, burada mühafizəkar qüvvələrdən fərqli olaraq Məsud Pezeşkianın rolu böyükdür. Səfərdən sonra Zəngəzur dəhlizi məsələsində rəsmi Tehranın mövqeyində dəyişiklik olması gözləniləndir. Çünki bu məsələnin həlli İran üçün də bir çox yöndən faydalıdır. Ən azı Azərbaycan ilə münasibətlərin istiləşməsi, yaxınlaşması, yeni əlaqələrin qurulması sürətlənə bilər. İranla bir çox sahədə əlaqələrin inkişafı hər iki ölkə üçün vacibdir. Çünki regionda gərginliyin azalması, sülhün davamlı olması, ortaq iqtisadi layihələrin həyata keçirilməsi həm region üçün, həm də hər iki dövlət üçün böyük əhəmiyyət kəsb edir. İran prezidentinin səfərindən öncə verdiyi ümidverici açıqlamaları, Azərbaycana baş tutan səfəri, Bakıda dostcasına, isti qarşılanması artıq anlaşılmaz qalan məsələlərin yoluna düşəcəyinin mesajıdır. Prezidentlərin görüşündə bütün lazımi danışıqların, o cümlədən Zəngəzur dəhlizi ilə bağlı müzakirələrin aparılması, aidiyyəti mövzular üzrə razılığa gəlinməsi gözləniləndir".
