“Prezident İlham Əliyev Çinlə əlaqələrin dərinləşdirilməsinə böyük önəm verir”.
APA xəbər verir ki, bunu Azərbaycanın Baş nazirinin müavini Şahin Mustafayev Çin Xalq Respublikasının qurulmasının 76-cı ildönümünə həsr olunmuş tədbirdə çıxışı zamanı deyib.
Şahin Mustafayev iki ölkə arasında həm dövlət nümayəndələri, həm də şirkətlər səviyyəsində mütəmadi olaraq qarşılıqlı səfərlərin keçirildiyini və ikitərəfli əlaqələrdə keyfiyyətcə yeni mərhələyə qədəm qoyulduğunu bildirib.
“Bu yaxınlarda Azərbaycandan olan nümayəndə heyəti Çinə səfər edib. Səfər çərçivəsində, 25-ci Beynəlxalq İnvestisiya Forumunda iştirak edilib. Bizim ölkəmiz forumda “Azərbaycana investisiya yatırın” adlanan milli stendlə təmsil olunub”- Şahin Mustafayev qeyd edib.
O, 1995-ci ildən 2025-ci ilin birinci yarısına kimi Çindən Azərbaycana yönləndirilən birbaşa investisiyanın həcmi 942.3 milyon dollar təşkil etdiyini bildirib.
“Azərbaycanın Çinə yönləndirdiyi ümumi investisiyanın həcmi 2.1 milyard dollar təşkil edir ki, bunun 1.9 milyardı Dövlət Neft Fondunun payına düşür”- Baş nazirin müavini əlavə edib.
Şahin Mustafayev Çini Azərbaycanın yaşıl enerji sahəsində əsas tərəfdaşı adlandırıb.
İki ölkə arasında humanitar əlaqələrin inkişafına toxunan Şahin Mustafayev Heydər Əliyev Fondunun Çində bir sıra humanitar layihələr həyata keçirdiyini deyib.
Baş nazirin müavini Azərbaycan-Çin əlaqələrinin gələcəkdə daha da genişlənəcəyini vurğulayıb.
