"Görünür elə məhz buna görədir ki, rəsmi İrəvan Ermənistan-Azərbaycan sərhədindəki gərginliyi siyasiləşdirdi"
“Azərbaycan Şuşada “Xarıbülbül” musiqi festivalını keçirməklə bu torpaqların tarixi kimliyini bir daha dünyaya nümayiş etdirdi”. Bunu “Şərq”ə Diaspor Fəaliyyətinə Jurnalistlərin Dəstəyi İctimai Birliyinin sədri Fuad Hüseynzadə deyib. Birlik rəhbəri vurğulayıb ki, festival dünya azərbaycanlılarının qürur və sevincinə səbəb oldu: “Bu həm də tarixi Zəfər, Qələbə festivalı, konserti idi. Ona görə də sədaları və sondakı atəşfəşanlıq erməniləri kəskin şəkildə narahat etdi. Ermənilər bir daha məğlubiyyətin acısını yaşamış oldular. Festivalın və atəşfəşanlığın görüntülərinin ermənilər tərəfindən sosial şəbəkələrdə yayılması, erməni ekspertlərinin bu haqda kədərli açıqlamaları bunun bariz nümunəsidir.
“Xarıbülbül” musiqi festivalına Ermənistan rəhbərliyi özünün çirkin siyasəti ilə cavab verməyə çalışdı. Görünür elə məhz buna görədir ki, rəsmi İrəvan Ermənistan-Azərbaycan sərhədindəki gərginliyi siyasiləşdirdi.
Hətta Rusiyanı, o cümlədən KTMT-ni də bu siyasi oyununa alət etməyə cəhd göstərdi, amma istəyinə çata bilmədi. Lakin ermənilər xarici ölkələrdə Azərbaycana qarşı qarayaxma kampaniyaları aparmağa və tərxibatlar törətməyə üstünlük verirlər.
Xüsusən, erməni diasporunun ideoloji mərkəzi hesab olunan Amerikanın Erməni Milli Komitəsi (ANCA) son günlər bu baxımdan daha da fəallaşıb.
ANCA üzvü olan ermənipərəst konqresmenlər ABŞ Prezidenti Cozef Baydenə və dövlət katibi Entoni Blinkenə məktublar yazaraq Azərbaycan əleyhinə çıxışlar edirlər.
Onlar Bayden Administrasiyasının “907-ci düzəliş”dən imtinasından narahatlıqlarını bildirir, Azərbaycana qarşı sanksiyaların tətbiqi üçün çağırışlar edirlər. Konqresin ermənipərəst üzvləri sosial şəbəkə profillərində Ermənistan-Azərbaycan arasındakı son sərhəd gərginliyini əsas tutaraq, ölkəmiz əleyhinə təxribatçı fikirlər səsləndirirlər”.
F.Hüseynzadənin sözlərinə görə, belə məqamda ABŞ ermənilərinin soydaşlarımıza qarşı təxribatlar törətməsi gözləniləndir: “İyul hadisələri zamanı, Vətən müharibəsi dövründə biz ermənilər tərəfindən edilən bu kimi halların şahidi olduq.
ABŞ-ın Los-Anceles şəhərindəki Azərbaycan konsulluğunun erməni ekstremistlərin mümkün təxribatları ilə bağlı müraciəti də bundan irəli gəlir. Bütün bunlar Ermənistanın 44 günlük Vətən müharibəsində məğlubiyyətinin aqressiyasıdır. Dünya erməniləri Azərbaycanın şanlı zəfərini həzm edə bilmirlər. “Xarıbülbül” festivalı isə Ermənistana musiqi sədaları altında vurulan növbəti Dəmir yumruq oldu.
Məhz buna görə də ermənilər milli xislətlərinə uyğun olaraq terror və təxribatçı əməllərə əl atırlar”.