Yaponiyanın Kyoto Dövlət Universitetinin mütəxəssisləri COVID-19-la bağlı yoxlama prosesində mühüm irəliləyiş əldə ediblər.
Sherg.az report-a istinadən xəbər verir ki, məlumata görə, Yasuxiro Sukamotonun rəhbərlik etdiyi qrup COVID-19 diaqnozu qoya bilən üz maskası hazırlayıb.
Alimlərdən ibarət qrup üzvləri koronavirusun aktiv və təhlükəli olmayan formasını dişi dəvəquşunun bədəninə yeritməklə, quşların yumurtalarından yüksək miqdarda antitel çıxara bilib. Hazırladıqları xüsusi filtri üz maskasına əlavə edən mütəxəssislər dəvəquşu yumurtalarından əldə edilən COVID-19 antitellərini maskanın üzərinə səpərək ixtiranın effektivliyini yoxlayıblar.
Maskanın ultrabənövşəyi şüa altında virusa reaksiya verməsinə nail olan alimlər qoruyucu vasitədən istifadə edən şəxs virusla təmasda olduğu halda maskanın parıldadığını və bunun müsbət nəticəyə işarə etdiyini qeyd ediblər. Maskanın 10 günlük sınaq müddətində COVID-19-a yoluxmuş 32 subyektdə virusu aşkarlaya bildiyi açıqlanıb.
Virusun mövcud olduğunu göstərən parlaqlıq ən çox üz və burun nahiyələrində müşahidə olunub.