Tam dəqiq olmasa da bunu dəniz, hovuz mövsümü ilə əlaqələndirirlər
Səpkilərlə müşayiət olunan xəstəliyi suçiçəyi ilə qarışdırmaq olmaz
Səpkilərlə müşayiət olunan xəstəliyi suçiçəyi ilə qarışdırmaq olmaz
Türkiyə həkimləri həyəcan siqnalı verirlər. Səbəb uşaqlarda sürətlə yayılan və əldə, ayaqda və ağızda səpkilərlə müşayiət olunan xəstəlikdir. Maraqlı odur ki, bu səpkiləri su çiçəyi ilə qarışdırmaq asandır. Bu da xəstəliyin irəliləməsinə gətirib çıxarır. Həkim Ülkü Yilmaz Tıraşın sözlərinə görə, “Koksaki virus A16” və “enterovirus 71” adlı iki virusun ötürülməsi nəticəsində yaranan əl, ayaq və ağız xəstəliyi böyüklərə də təsir edə bilər, lakin kiçik uşaqlar arasında daha çox yayılır.
Əl, ayaq və ağız xəstəliyi - qızılca, məxmərək və parotit kimi uşaqlıq peyvəndlərinin edildiyi cəmiyyətlərdə ən çox rast gəlinən səpki xəstəliklərindən biridir.
Pediatr Nüşabə Cəbrayılova isə “Sherg.az”a açıqlamasında deyib ki, əsasən uşaq yaş dövrlərində rast gəlinən ayaq-ovuc-ağız xəstəliyi, enterovirus ailəsindən olan, (enterovirus-71) koksaki virusları tərəfindən törədilir. Yaz-yay dönəmində daha sıx rast gəlinir: “Tam dəqiq olmasa da bunu dəniz, hovuz mövsümü ilə əlaqələndirirlər. Kontakt yolla (nəfəs, ağız suyu, fekal) yoluxur. Xəstəlik yoluxucudur. Daha çox baxça yaş uşaqlarda rast gəlinir. Orqanizmin virusa yoluxandan 3-5 gün sonra temperatur yüksəlir. Badamcıqlarda qızartı, ağzın selikli qişasında aftalar yaranmağa başlayır. 1-2 günlük temperaturdan sonra, bədənin müəyyən hissələrində səpkilər meydana çıxır. Səpkilər əsasən tipik olaraq, ayaq altında, ovucun içində, ağız ətrafında, agızın içində, bəzən çanaq nahiyəsində, əvvəl qırmızı ləkə, tezliklə içi suluqlu səpkilər şəklində büruzə verir. Bədənin gövdə hissəsində səpkilər adətən rast gəlinmir. Səpkilər demək olar hamısı eyni zamanda yaranır, yəni polimorfizmə malik deyil, demək olar qaşınma olmur. Temperatur 3 gün, bəzən 7 günə kimi uzana bilər. Xəstəlik 7-10 gün ərzində keçib gedir.
Çox zaman suçiçəyi səpkisi ilə qarışıq salınır. Səpkinin yerləşimi, qaşıntı olmaması, qeyri-polimorfik olması və s. əsas ayırdedici əlamətlərdəndir.
Digər viral infeksiyalar kimi simptomatik müalicə aparılır. Antibiotik müalicəsi təbii ki, yersizdir. Koksaki, Enterovirus-71 növünə birbaşa təsir edən antivirus preparat olmadığından, həmin preparatların da qəbulu təsirsizdir”.
