Paris oyuncaq Ermənistan dövlətinin əli ilə Cənubi Qafqazı militarizasiya zonasına çevirməyə çalışır
"44 günlük İkinci Qarabağ müharibəsi Ermənistanın məğlubiyyəti ilə, 23 saatlıq lokal antiterror tədbirlərinin Qarabağdakı separatçı rejimin darmadağın edilməsilə başa çatması bəzi ölkələrin, o cümlədən Fransanın da gerçək simasını tam olaraq tanımağımıza yardımçı oldu". Bu barədə "Sherg.az"a politoloq Əlisahib Hüseynov deyib.
Ekspert bildirib ki, əvvəllər özünü zorən neytral göstərməyə çalışan bu ermənipərəst ölkənin indi axırıncı maskası da düşüb: "Fransa Ermənistanı revanşizmə təhrik etdiyini və Cənubi Qafqazda qalıcı sülhün bərqərar olmasını istəmədiyini gizlətməyə artıq cəhd də göstərmir. Bu ölkə Azərbaycana qarşı düşmənçiliyini açıq müstəviyə keçirib. Fransanın müdafiə naziri Sebastyan Lekornyu utanmadan bəyan edir ki, onun ölkəsi Ermənistana hava hücumundan müdafiə silahları satmağa hazırlaşır. Əsl həqiqətdə isə Fransanın müdafiə naziri saxtakarlıq edib və gerçəkləri tam açıqlamayıb".
Ə.Hüseynov əlavə edib ki, araşdırmalar göstərir ki, Fransa Ermənistanı Hindistanın vasitəsilə çoxdan silahlandırır və bu silahların tərkibinə təkcə müdafiə deyil, hücum silahları da daxildir: "Görünən budur ki, Fransa oyuncaq Ermənistan dövlətinin əli ilə Cənubi Qafqazı militarizasiya zonasına çevirməyə çalışır. Rəsmi Paris bu planını həyata keçirməkdə başlıca olaraq iki məqsəd güdür. Birincisi, böhran dövrünü yaşayan fransız hərbi sənayesi üçün yeni bazar əldə etməkdir. İkinci məqsəd isə Cənubi Qafqazda tam olaraq yerləşməkdən ibarətdir.
Lakin həm Azərbaycanın, həm də regionda marağı olan digər qlobal güclərin Fransaya öz məkrli planlarını həyata keçirməyə mane olacağı təbiidir. "3+3" formatında əməkdaşlıq prosesinin güncəlləşdirilməsi də Ermənistanı Fransa kimi imperialist güclərin ağuşundan qoparmağa, onu sülh və təhlükəsizliyin təmin olunması xəttinə qaytarmağa xidmət edir".
