Ermənistan Baş naziri Nikol Paşinyan Estoniyaya səfəri ilə Qərbin ona qarşı sərtləşmiş münasibətini yumşaltmağa çalışır ki, Moskvaya gözlənilən səfəri mümkün olsun. Bu barədə “Hraparak” qəzeti yazır. Erməni nəşri qeyd edir ki, Qərb Paşinyanın mayın 9-da İkinci Dünya müharibəsində qələbənin 80 illiyi ilə əlaqədar keçiriləcək tədbirlərdə iştirak üçün Moskvaya səfəri ilə bağlı açıq şəkildə ultimatum verib. “Ona bildirilib ki, Ermənistan-Rusiya münasibətlərinin istiləşməsi Qərb üçün məqbul deyil. Avropa İttifaqının (Aİ) xarici siyasət xidmətinin rəhbəri Kaya Kallas bir neçə gün əvvəl açıq şəkildə bəyan etmişdi ki, Aİ-yə namizəd ölkələr Moskva hərbi paradında iştirak etməməlidir. Latviya xarici işlər naziri Bayba Braje isə bu qadağanı pozanlara qarşı mümkün sanksiyalara eyham vurub. Ermənistan Aİ üzvlüyünə namizəd olmasa da, parlament “Ermənistanın Avropa İttifaqına daxil olması prosesinin başlanması haqqında” qanun layihəsini qəbul edib. Kallas əvvəllər ölkənin baş naziri vəzifəsini tutmuş estoniyalıdır. Hakim komandada dolaşan rəyə görə, Paşinyan Qərbə sadiqliyini bir daha təsdiqləmək və Rusiyadan gözlənilən zərbənin qarşısını almaq üçün Moskvaya getməyə məcbur olduğu mesajı vermək üçün Estoniyaya səfər edib.
Sosial Tədqiqatlar Mərkəzinin sektor müdiri, politoloq Tural İsmayılov Sherg.az-a bildirib ki, bu gün Nikol Paşinyan Ermənistanı elə çıxılmaz hala salıb ki, rəsmi İrəvan düşdüyü xaos vəziyyətindən xilas ola bilmir:
“Hazırda Ermənistanın əraziləri siyasi baxımdan fərqli qüvvələrə peşkəş verilib. Ermənistan bir tərəfdən Avropa İttifaqına daxil olma prosesinin başlaması üçün qanun layihəsi qəbul edir, digər tərəfdən isə Avrasiya İqtisadi İttifaqı və Kollektiv Təhlükəsizlik Müqaviləsi Təşkilatının üzvü olaraq qalır. Bunu isə Qərb və Rusiya tərəfi açıq şəkildə görür. Sadəcə olaraq Qərb Rusiyanın tarixi forpostu kimi dəyərləndirilən Ermənistandan istifadə etməyə çalışır. Eyni zamanda Qərbdə Ermənistandan müxtəlif məqsədləri üçün yararlanmaq adına Nikol Paşinyanı fərqli siyasi oyunlara cəlb edirlər. Paşinyanın Estoniyada verdiyi mesajlar göstərir ki, Avropa İttifaqı Nikol Paşinyan vasitəsilə Rusiyaya qarşı yeni cəbhə yaratmaqda maraqlıdır. Ermənistanda Rusiyanın hərbi bazası olsa da, Aİ özünün yeni planları üçün Ermənistan ərazilərini bir vasitə kimi görür. Paşinyanın Rusiyadan öncə Estoniyaya etdiyi səfər ümumi mesaj xarakteri daşıyır. Yəni Paşinyan Cənub-Şərqi Avropa ölkələrinə göstərmək istəyir ki, Rusiyaya getsə də, onların Baltikyanı ölkələrlə bağlı mövqeyləri ilə razılaşmır. Təbii ki, bütün bunlar saxtakar və qeyri-səmimi siyasi xəttin bir parçasıdır”.
