2024-cü ilin dekabrında Qazaxıstanın Aktau şəhəri yaxınlığında baş verən "Azərbaycan Hava Yolları"na məxsus sərnişin təyyarəsinin qəzası ilə bağlı Rusiya Xarici İşlər Nazirliyi 1.003 milyard rubl məbləğində sığorta vəsaitinin ayrıldığını və xəsarət alanlarla həlak olanların ailələrinə 358.4 milyon rubl ödəniş edildiyini iddia edib. Lakin Milli Qəhrəman Hökumə Əliyevanın atası Cəlil Alıyev bu iddiaları təkzib edib. Azərbaycan Xarici İşlər Nazirliyi isə bildirib ki, Rusiya yalnız sığorta məbləğini ödəyib, kompensasiya ödənişləri hələ qalmaqdadır. Hadisədə Rusiyanın məsuliyyəti beynəlxalq hüquq və aviasiya qaydaları çərçivəsində dəqiq müəyyən olunub və bu öhdəlikləri yerinə yetirməsi zəruridir.
“Azərbaycan Hava Yolları" Qapalı Səhmdar Cəmiyyətinin (AZAL) sabiq prezidenti Ədalət Əliyev Sherg.az-a təyyarəyə dəyən ziyanla bağlı məsuliyyətin bilavasitə Rusiyanın üzərinə düşdüyünü söyləyib:
"Rusiya bu ziyana görə bütün xərcləri-təyyarənin dəyərini, zərərçəkmiş və həlak olmuş sərnişinlərlə bağlı bütün maddi kompensasiyaları tam şəkildə öz üzərinə götürməli və ödəməlidir. Bu, beynəlxalq təcrübədə qəbul olunmuş normalara uyğundur. Əgər Rusiya bu öhdəlikləri yerinə yetirməzsə, bu, onun beynəlxalq mülki aviasiya təşkilatlarının qaydalarını, BMT-nin müvafiq sənədlərini və hava nəqliyyatı sahəsində imzalanmış dövlətlərarası müqavilələri pozması deməkdir".
