Məktəblərdə müəllim-şagird nisbəti yeni metodologiya ilə müəyyən ediləcək. Bununla bağlı Nazirlər Kabineti "Müəllim-şagird nisbətinə dair ölkə üzrə göstəricilərin müəyyən edilməsi metodologiyası”nı təsdiq edib.
Yeni metodologiya Dövlət Statistika Komitəsinin təklifi nəzərə alınmaqla hazırlanıb. Bu metodologiya statistik müşahidələrin nəticələri əsasında formalaşan rəsmi statistik məlumatlardan istifadə edilməklə, ümumi təhsilin hər bir səviyyəsi üzrə müəllim-şagird nisbətinin hesablanması üsulunu müəyyənləşdirir.
Sənəddə qeyd edilir ki, müəllim-şagird nisbəti ümumi təhsilin hər bir səviyyəsi üzrə şagirdlərin ümumi sayının həmin səviyyə üzrə tədris edən müəllimlərin ümumi sayına nisbəti ilə müəyyən edilir.
Ümumi orta təhsil səviyyəsində tədris edən müəllimlər tam orta təhsil səviyyəsində də tədris etdikləri üçün ümumi təhsilin bu səviyyəsində müəllim-şagird nisbətinin hesablanması məqsədi ilə ilk növbədə həmin təhsil səviyyəsində tədris edən müəllimlərin nisbi sayı müəyyən edilməlidir.
Orta məktəblərdə müəllim-şagird nisbəti ilə bağlı metodologiyanın çoxdan olduğunu deyən təhsil üzrə mütəxəssis Nabatəli Qulamoğlu "Şərq”ə bildirib ki, hazırda ölkəmizdə hər 8 şagirdə 1 müəllim düşür:
"6-7 il bundan qabaq bu rəqəm 17 idi. Yəni hər 17 şagirdə 1 müəllim düşürdü. İndi isə bu nisbət azalıb. Yeni metodun əvvəlkilərdən bir neçə fərqi var. Yeni metodologiyaya görə, müəllim-şagird sayı optimal vəziyyətdə olmalı, müəllimlərin dərs keçə bilməsi, müəyyən pedaqoji fəaliyyətlər göstərməsi üçün şərait yaradılmalıdır. Düşünürəm ki, hazırkı statistika düzgün deyil. Fikrimcə, bu dəqiqə ölkəmizdəki məktəblərdə həddindən çox sıxlıq var.
Elə sinif var ki, orda 35-40 şagird təhsil alır və təbii ki, bu zaman təhsil keyfiyyətindən danışmaq olmaz. Ona görə də metodologiyadan əvvəl elə etmək lazımdır ki, məktəblərdəki sıxlıq aradan qaldırılsın. Bunun üçün yeganə yol yeni məktəblərin tikilməsi, yaxud da ərazisinin genişləndirilməsidir. Məsələn, Xırdalanda 5 nömrəli məktəb 2500 şagird üçün hesablanıb, amma 5 min şagird təhsil alır. Əlbəttə, orda təhsilin yüksək keyfiyyətindən danışmağa dəyməz. Hesab edirəm ki, məktəblərimizdə müəllim-şagird nisbəti kritik durumdadır. İlk öncə bu vəziyyəti düzəltmək lazımdır”.
Yeganə Bayramova
