"Moskvanın təşəbbüsü ilə baş tutacaq görüşdən pozitiv nəticə gözləmirəm"
"Qarabağ münaqişəsinin nizamlanması ilə bağlı sənədə dair Ermənistan və Azərbaycan liderləri arasında heç bir razılaşma yoxdur”. Bunu Ermənistan baş nazirinin mətbuat katibi Vladimir Karapetyan bildirib. O bəyan edib ki, yaxın vaxtlarda XİN rəhbərləri səviyyəsində baş tutacaq görüşdə ən yüksək səviyyədə danışıqlar məsələsinə aydınlıq gətiriləcək. Məlumat üçün deyək ki, son günlər erməni mətbuatında Qarabağ üzrə sənədin imzalanması, həmçinin Ermənistan və Azərbaycan liderlərinin rəsmi görüşünün təşkilinə dair razılaşmalarla bağlı informasiyalar dolaşmaqdadır. Karapetyan isə yazılanların şayiələrdən ibarət olduğunu söyləyib. Xatırladaq ki, yanvarın 16-da Parisdə Azərbaycanın xarici işlər naziri Elmar Məmmədyarov və Ermənistanın xarici işlər naziri vəzifəsini icra edən Zöhrab Mnatsakanyan arasında görüş olub.
Tərəflər danışıqlar zamanı bir sıra məsələləri, o cümlədən hər iki tərəfin əhalisinin sülhə, təhlükəsizliyə və dayanıqlı regional inkişafa hazırlanması yollarını müzakirə ediblər. Yaxın günlərdə isə Almaniyanın Münhen şəhərində nazirlərin növbəti görüşü planlaşdırılır. Lakin bu görüş Rusiyanın xarici işlər naziri Sergey Lavrovun birbaşa təşəbbüsü və iştirakı ilə reallaşacaq.
Ehtimal edilən görüşlə bağlı "Şərq”ə danışan politoloq Natiq Miri xarici işlər nazirlərinin Rusiyanın təşəbbüsü ilə bir araya gəlməsinə müsbət yanaşmadığını deyib. Onun sözlərinə görə, Rusiya bütün zamanlarda prosesə dağıdıcı tərəfdən yanaşıb:
"Moskvanın təşəbbüsü ilə baş tutacaq görüşdən pozitiv nəticə gözləmirəm. Nəzərə alaq ki, görüşün təşkilatçısı ermənilərə sevgisi ilə tanınan Rusiya xarici işlər naziri Sergey Lavrovdur. O da reallıqdır ki, Kremldəki bəzi dairələr bütün zamanlarda Qarabağ prosesinə zərbə vurmağa çalışırlar. Özümüzü aldatmayaq. Rusiya Dağlıq Qarabağ problemini həm Ermənistana, həm də Azərbaycana təzyiq mexanizmi kimi görür. Bu yanaşma dəyişmədikcə, münaqişənin həllində hansısa irəliləyiş gözləmək əbəsdir. Münhendə baş tutacaq görüşün əsas məqsədi Rusiyanın münaqişənin həlli prosesində təşəbbüsü öz əlinə almaq cəhdidir.
Rusiya narahatdır ki, ABŞ və Avropa ölkələri məsələyə müdaxilə edərsə, Moskva öz təsir imkanlarını itirə bilər. Ona görə də digər həmsədr dövlətlərə imkan vermək istəmir. Xüsusən də ABŞ-ın Dağlıq Qarabağ problemi yönündə nisbətən aktivləşməsi və amerikalı rəsmilərin açıqlamaları Moskvanı təşvişə sövq edir. Lavrovun təşəbbüsü ilə baş tutacaq görüşü də məhz Rusiyanın narahatlığı kontekstində dəyərləndirmək lazımdır. Erməni tərəfi də bunu nəzərə alaraq bəyan edir ki, hələlik ciddi danışıqlarla bağlı söhbət getmir”.
İsmayıl
