Sumqayıt şəhərinin 25 yaşlı bərbəri Vüsal Abdulhüseynov şəhid ailələrinə yardım məqsədi ilə humanitar kampaniyaya start verib. Belə ki, o, şəhid və imkansız ailələrə xidməti pulsuz yerinə yetirir.
"Şəhid və kimsəsiz ailələrə pulsuz yardım göstərmək istədim. Onlara kömək məqsədilə bu cür yola əl atdım. Şəhid ailələrinə diqqət önəmlidir. Onlara borcumu bu yolla ödəməyə çalışıram”.
Xeyirxah bərbər deyir ki, bəzi insanlar bundan sui-istifadə edirlər. Amma buna baxmayaraq, o, xeyirxah əməlini davam etməkdə israrlıdır. Şəhər sakinləri onun bu əməlini təqdirəlayiq adlandırır və rəğbətlə qarşılayırlar.
25 yaşlı saç ustası bu əməlindən böyük şərəf duyduğunu və hər zaman sevə-sevə davam etdirəcəyini deyir.
Sosioloq Əhməd Qəşəmoğlu bərbərin atdığı addımın olduqca təqdirəlayiq olduğunu deyib. O bildirib ki, bu dəqiqə cəmiyyətimizin ən böyük bəlası daha çox maddiyyata meyillənməsi, get-gedə maddi dəyərlərin mənəvi dəyərləri sıxışdırmasıdır: "Belə addım mənəvi cəhətdən olduqca yaxşı qarşılanmalıdır. Əgər cəmiyyətimizdə mənəviyyatla bağlı problemlər varsa, maddiyyat get-gedə eybəcər fəsadlar doğurursa, həmin bərbər kimi insanların gördüyü işi alqışlamalıyıq. Belə halları daha çox təbliğ etməliyik. İnsanlar görsün ki, bizdə milli kökümüzdən, dinimizdən gələn insanlıq dəyərləri hələ də yaşayır və ona hörmət qoyulur”.
Yeganə Bayramova
