Yaponiya ölkə daxilində yaranan taxıl qıtlığı səbəbindən 1999-cu ildən bəri ilk dəfə Cənubi Koreyadan düyü idxal edib.
Teleqraf xəbər verir ki, bu barədə "Bloomberg" agentliyi məlumat yayıb.
Yaponiyanın Kənd Təsərrüfatı, Meşə Təsərrüfatı və Balıqçılıq Nazirliyinin verdiyi məlumata görə, aprel ayında Yaponiyada düyü qiymətləri bir il əvvələ nisbətən iki dəfədən çox artıb. Qiymət artımı əsasən 2024-cü ildə təbii fəlakətlər və yüksək temperatur səbəbindən məhsuldarlığın azalması, həmçinin pandemiyadan sonra ölkəyə turist axınının bərpa olunması ilə izah edilir.
Düyü idxalını Koreya Respublikası Kənd Təsərrüfatı Kooperativləri Milli Federasiyasının (NongHyup) Yaponiyadakı ofisi həyata keçirib. Cənubi Koreyada 2 ton düyü alınaraq, onu Yaponiyada yerli supermarketlər və onlayn platformalar vasitəsilə satışa çıxarıblar. Federasiyanın nümayəndəsinin sözlərinə görə, həftənin sonuna qədər əlavə 20 ton Cənubi Koreya düyüsünün Yaponiyaya çatdırılması gözlənilir.
"Bloomberg" qeyd edib ki, əvvəlki illərdə idxal rüsumları səbəbindən Cənubi Koreya düyüsü Yaponiyada rəqabətə davamlı deyildi. Lakin hazırkı vəziyyətdə artan tələbat və yerli bazarda qiymətlərin yüksəlməsi fonunda bu maneələr zəifləyib.
Agentlik əlavə edib ki, Cənubi Koreya, Yaponiya və Çin arasında ticarət əlaqələrinin gücləndirilməsi tendensiyası ABŞ-ın sabiq prezidenti Donald Trampın proteksionist siyasətinə cavab olaraq formalaşıb. Bu çərçivədə Seul, Tokio və Pekin bir-birilə əməkdaşlığı artırmağa çalışır.
