Bu məsafə 4 saat 55 dəqiqəyə qət olunacaq
“Marşrutun nə dərəcədə rentabelli olduğunu demək indidən tezdir. Bunun üçün ən azı 3-4 ay vaxt keçməlidir”
“Azərbaycan Dəmir Yolları” (ADY) Qapalı Səhmdar Cəmiyyəti martın 18-dən etibarən Bakı-Gəncə-Bakı istiqamətində hərəkət edən sürətli qatarın marşrutunu Ağstafa stansiyasına qədər uzadaraq Bakı-Ağstafa-Bakı marşrutu üzrə ilk dəfə sürətli qatarla sərnişin daşımalarını həyata keçirəcək.
ADY-dən"Şərq"ə verilən məlumata görə, biletlər martın 10-dan satışa çıxarılacaq.
Qeyd olunub ki, sərnişinlər Bakıdan Ağstafaya 2020-ci ilin martına qədər fəaliyyət göstərən sərnişin qatarı ilə 8 saata çatdırılırdısa, artıq bu məsafə 4 saat 55 dəqiqəyə qət olunacaq. Marşrut xəttinin uzadılması Tovuz stansiyasında da fəaliyyətin təmin olunmasına imkan yaradır.
Hərəkət cədvəlinə gəlincə, sürətli sərnişin qatarı hər gün saat 08:45-də Bakıdan Ağstafaya yola düşərək saat 13:40-da mənzil başına çatacaq. Ağstafa-Bakı marşrutu üzrə isə qatar hər gün saat 17:10-da yola düşəcək və Bakı Dəmiryol Vağzalına saat 22:05-də çatacaq. Sürətli sərnişin qatarının müvafiq marşrut üzrə orta sürəti 100 km/saat təşkil edəcək.
Marşrut üzrə Bakıdan Ağstafaya kimi bir istiqamətə gedişhaqqı standart sinif üçün yerlərdə 17 manat, Bakı-Tovuz istiqaməti üçün isə 16 manat təşkil edir. Biletləri Dəmiryol Vağzallarının kassalarından və ya ADY-nin rəsmi saytından onlayn əldə etmək mümkündür.
459 km uzunluğunda olan Bakı-Ağstafa-Bakı marşrutu üzrə İsveçrənin “Stadler Rail Group” şirkətinin istehsalı olan dördvaqonlu, ikimərtəbəli sürətli sərnişin qatarı hərəkət edəcək. Qatarın ümumi sərnişin tutumu 364 yerdir.
Qeyd edək ki, Azərbaycan da daxil olmaqla MDB-də qüvvədə olan dəmir yollarının sürət normativlərinə əsasən, sərnişin qatarının orta sürəti 50-90 km/saat təşkil edərsə, bu, sürət qatarı, 91 km/saatdan artıq olduqda isə sürətli sərnişin qatarı hesab olunur. Azərbaycan Dəmir Yolları MDB Dəmir Yolları Şurasının üzvü olduğundan öz fəaliyyətində həmin Şuranın normativlərinə istinad edir.
Nəqliyyat eksperti Eldəniz Cəfərov isə “Şərq”ə açıqlamasında Bakı-Ağstafa-Bakı marşrutu üzrə sürətli qatarla sərnişin daşımalarının həyata keçirilməsini müsbət hadisə kimi dəyərləndirib. Sürət qatarlarının rahat və çox əlverişli nəqliyyat növü olduğunu vurğulayan ekspert həmçinin qeyd edib ki, dəmir yolu sərnişindaşımaları avtomobil nəqliyyatına nisbətən həm təhlükəsiz, həm səmərəli, həm də ekoloji cəhətdən təmizdir. Bu kimi səbəblərə görə bir çox ölkələrdə bu sektorun inkişafına xüsusi əhəmiyyət verilir.
Ekspertin sözlərinə görə, Bakı-Ağstafa-Bakı sürət qatarının nə dərəcədə rentabelli olduğunu demək indidən tezdir. Bunun üçün ən azı 3 -4 ay vaxt keçməlidir:
“Ümumilikdə isə dəmiryolu sərnişin daşımasında rentabelliyi artırmaq üçün xidmət səviyyəsini yüksəltməklə sərnişindaşımanın həcminin artırılmasına nail olmaq lazımdır. Rahatlıq həm hərəkəti, həm də təklif olunan xidmətlərin səviyyəsini əhatə etməlidir. Bura isitmə və soyutma sistemindən tutmuş, yüksək sürət zamanı "Vi-Fi" və mobil rabitə şəbəkəsinin sabit işinə kimi olan bütün məsələlər daxildir.
Son addım kimi sərnişindaşımanın tariflərinin optimallaşdırılmasına baxıla bilər ki, bu da birbaşa olaraq rentabelliyin artırılmasını təmin edəcək”.
