“MTV Azərbaycan” şou əhlinin sosial şəbəkələrdən əldə etdiyi gəliri araşdırıb.
“Sherg.az” xəbər verir ki, şirkətlərin reklam üçün ən çox müraciət etdiyi məşhurların Röya Ayxan, Aygün Kazımova, Tünzalə Ağayeva, Sevil Sevinc bacıları, Günay İbrahimli, Sevda Yahyayeva olduğunu söyləyib. S.Yahyayeva reklam məsələsində çox seçiçi olduğunu xüsusi vurğulayıb:
“Bunu bütün dünya ulduzları edir. Bizdə niyə olmasın?! Qiymət açıqlamayacam. Belə məsələləri sevmirəm. Mən də pul qarşılığında paylaşmışam. Həddən artıq reklam təklifləri gəlib. Baxıram ki, nəyi paylaşa bilərəm. Hər şeyi qəbul etmirəm”.
Müğənni Nihat Məlik isə əldə etdiyi qazancın miqdarını açıqlayıb:
“İnstaqramda reklam təklifləri gəlib. Qəbul etməmişəm. Mən müğənniyəm və öz sənətimi nümayiş etdirirəm. “Youtube” daha çox gəlir gətirir. İnstaqram səhifəmdən pul qazanmıram. “YouTube”dən 5-7 min dollar məbləğində qazancım olub”.
Aparıcı Çinarə Əliyeva İnstaqram hesabında reklam üçün paylaşımlar etdiyini bildirib:
“Hekayə bölümündə 24 saatlıq paylaşım 300 manatdır. Səhifəmdə paylaşım isə 500-lə 1000 AZN arasında dəyişir.
Aktrisa Pərvin Abıyeva isə İnstaqram sayəsində dolandığını deyib:
“Yetəri qədər gəlir olmasa da , heç yoxdan yaxşıdır. Məndə şərtlər çoxdur. Hekayə bölümündə bir post 500 manatdır”.
Xatun Əliyevanın prodüseri Pənah Eldar hekayə bölümündə 500-1000 manat, əsas səhifədə isə 2000-1500 manata paylaşım edildiyini söyləyib.
Nazənin Salayevanın prodüseri Pərviz Fəqan qeyd edib ki, dost şirkətlərə reklam ödənişsizdir:
“Ya biz çox pul alırıq, ya da heç almırıq”.
