2025/2026-cı tədris ili üzrə ali və orta ixtisas təhsili müəssisələrində təhsil alan tələbələrin köçürülməsi prosesinin elektron sənəd qəbulu mərhələsi elan olunur.
Bu barədə Elm və Ali Təhsil üzrə Dövlət Agentliyindən məlumat verilib.
Elektron müraciətlərin qəbulu 2025-ci il iyulun 15-i saat 11:00-da başlayacaq və iyulun 22-si saat 18:00-da başa çatacaq.
Köçürülmə prosesində iştirak etmək istəyən tələbələr portal.edu.az internet səhifəsində qeydiyyatdan keçərək şəxsi kabinet yaratmalı, daha sonra sistemə daxil olub elektron müraciət formasını doldurmalı və təsdiq etməlidirlər.
Təhsil eksperti Elçin Süleymanov “Sherg.az”a bildirib ki, tələbələrin köçürülməsi prosesi ildə bir dəfə, əsasən yay tətili dövründə həyata keçirilir:
“Bu dəyişiklik həm obyektiv, həm də subyektiv amillərlə əsaslandırılır. Əvvəllər köçürmə prosesi ildə iki dəfə aparılsa da, tələbələrin imtahan nəticələrinin informasiya sisteminə daxil edilməsindəki gecikmələr, habelə köçürüldüyü ali təhsil müəssisəsində sənədlərin transferinin müəyyən vaxt aparması nəticəsində tələbələrin yeni semestrə vaxtında qoşula bilməməsi bu qərarın verilməsinə səbəb olub. Hazırda həyata keçirilən köçürmələr müxtəlif səbəblərlə bağlıdır. Bura ailə vəziyyəti, xarici ölkələrdə təhsil alan tələbələrin tədris və yaşayışla bağlı problemlərlə üzləşərək təhsillərini Azərbaycanda davam etdirmək istəkləri, eyni zamanda regionlarda təhsil alan tələbələrin paytaxt universitetlərinə və əksinə, paytaxtdan region universitetlərinə köçürülmək arzuları daxildir. Bu, həmçinin tələbələrin qəbul zamanı seçdikləri ali təhsil müəssisələrinin maddi-texniki bazasını və tədris keyfiyyətini yenidən qiymətləndirərək daha uyğun hesab etdikləri universitetə keçmək niyyətləri ilə də bağlı ola bilər. Köçürmə zamanı tələbənin köçürülmək istədiyi ixtisas üzrə qəbul ili üçün müəyyən olunmuş minimal keçid balını toplamış olması şərtdir. Bundan əlavə, tələbə normativ təhsil proqramının ən azı 50 faizini mənimsəmiş olmalıdır. Məsələn, bakalavriat səviyyəsində məzuniyyət üçün tələb olunan 240 kreditin minimum 120-sinin tamamlanması mütləqdir”.
