Kista əməliyyatlarında ölüm faizi çox aşağıdır

Ancaq burda xəstənin individuallığı şərtdir 

"Kök, yaşlı, yanaşı xəstəlikləri olan şəxslər üçün əməliyyatın bütün hallarda riskləri yüksəkdir

Sentyabrın 23-də saat 17 radələrində Bərdə rayonu, Mustafağalı kənd sakini Ayşən Həsənovanın Bərdə rayon Mərkəzi Xəstəxanasında ölməsi barədə rayon prokurorluğuna məlumat daxil olub. Bərdə Rayon Prokurorluğundan verilən məlumata görə, dərhal prokurorluq əməkdaşları tərəfindən məhkəmə-tibb ekspertinin iştirakı ilə hadisə yerinə və meyitə baxış keçirilib, digər prosessual hərəkətlər yerinə yetirilib.

Aparılmış araşdırmalar zamanı müəyyən edilib ki, 1992-ci il təvəllüdlü Ayşən Həsənova qeyd edilən tarixdə "yumurtalığın boğulmuş kistası” diaqnozu ilə daxil olduğu Bərdə rayon Mərkəzi Xəstəxanasında "kistanın çıxarılması” cərrahi əməliyyatı olunduqdan sonra ölüb.

Ümumi-cərrah Ramil Nadirov "Şərq"ə açıqlamasında kista əməliyyatı üçün ölüm faizinin çox aşağı olduğunu deyib. Həkim bildirib ki, ancaq burda xəstənin individuallığı şərtdir:

"Kök, yaşlı, yanaşı xəstəlikləri olan şəxslər üçün əməliyyatın bütün hallarda riskləri yüksəkdir.  Ümumiyyətlə, qeyd edim ki,  yumurtalıq kistaları funksional və pataloji olur.

Funksional kistalara sarıcisim və folikulyar kistalar aiddir. Funksional kistalar müalicə olunaraq sorula bilər. Bəzən isə ölçüləri böyüyür və pataloji xarakter daşıyır. Bu halda əməliyyata ehtiyac duyulur. Pataloji yumurtalıq kistalarına dermoid kista, sadə serroz kistalar, parazit kistaları və yumurtalıq xərçəngi aiddir". 

Zamanında düzgün müalicə aparılmadıqda yumurtalıq kistalarının həyat üçün təhlükəli xarakter daşıdığını vurğulayan R.Nadirov  qeyd edib ki, gənc yaşlı (ana olmamış) qızlarda yumurtalıq kistalarına görə, laproskopik üsullu orqan qoruyucu əməliyyatların olunması vacibdir:

"Əgər yumurtalıq kistaları əməliyyat olunmazsa, bu zaman bir çox ağırlaşmalar yaranır. Birincisi, ölçüsü böyüyüb partlayaraq daxili qanaxma yarada bilər. Həmçinin ətraf orqanları sıxaraq bəzi problemlər yaradır. Məsələn, qəbizlik, hamilə qala bilməmək, sidiyə çıxa bilməmək və sair kimi. Hətta ağırlığına bağlı olaraq burula, irinləyə və uzun müddətdə xərçəngə çevrilə bilər".

Paylaş

Bizi Facebookda izləyin
Aynurə Pənahqızı Yazarın yazıları
menu
menu