“İndi Azərbaycanda uşaq pulu istəyirlər. Fikirləşmirlər ki, verilməyib əhali belə artır”
“Əgər uşaq pulu ödənilsə, necə olacaq?”
“Afrika və şərq ölkələrində əhalinin sürətlə artımı var və acından ölürlər”
“Əhalinin sayını artırmayın, təbii resurslarınızı məhv etməyin. Sonra da xahiş etməyin ki, qanuni və eyri-qanuni doğulan uşaqlarınızı dolandırsınlar”
“Dünyanın aparıcı düşüncəli adamlarını ən çox narahat edən məsələ planetdə ümumi hərarətin qalxması və onun fəsadlarıdır. Bununla bağlı Feysbukda öz fikirlərimi bölüşdüm. Ola bilər ki, mübahisəli olsun, birmənalı qarşılanmasın. Amma dünyanın beyin mərkəzlərinin hesabatlarına əsasən, onlardan müəyyən mülahizələri analiz edərək səsləndirilən fikirlərdir”.
Bu sözləri “Sherg.az”a açıqlamasında Vətəndaş Cəmiyyəti Alyansının rəhbəri, Yeni Yazarlar və Sənətçilər İctimai Birliyinin sədri, Prezident təqaüdçüsü, kitabxana.net, yenimedia.net portallarının təsisçisi, analitik-ekspert, yazıçı-kulturoloq Aydın Xan Əbilov söyləyib. O, son zamanlar meşə yanğınlarının, zəlzələ kimi fəlakətlərin baş verdiyini deyib:
“Bir çoxu təbiət hadisəsi kimi qəbul edilsə də, tektogenik qəzalar və insan əməli nəticəsində baş verənlər də olur. Sözügedən fikirlərdə müxtəlif obyektiv və subyektiv səbəblərdən planetimizin boğulması əsas götürülür. Həmçinin insan sayının azaldılması təklif edilib. Bu da bir çox savadsız, analtik təfəkkürü olmayan, iki kəlmə danışa bilməyən, ömründə bir kitab oxumayan şəxslərin etirazına səbəb ola bilər. Lakin bunu yalnız mən demirəm. Amerika Birləşmiş Ştatları başda olmaqla ən böyük ölkələrin düşüncə adamları, planetdə qlobal istiləşməyə və böhrana qarşı yaradılmış şəbəkənin nümayəndələri, beyin mərkəzlərinin liderləri, tanınmış ekspertlər deyirlər.
Hesab edilir ki, planetdə uzağı bir milyard civarında insanın yaşaması üçün şərait var. Əks halda Yer kürəsi yaxın gələcəkdə öz-özünü məhv edəcək, Mars və Venera kimi səhralığa çevriləcək.
Biz 16 yaşlı qızların ərə verilməsini müzakirə edirik. Dünyanın hər yerində qloballaşma və onun zərərli tərəfləri, sənayeləşmə, insan əməllərinin planetin məhvinə aparma nəticələri haqda düşünülür, kosmosa raketlər göndərilir.
Bizdə hələ dar düşüncəli insanların fikirləri ilə razılaşırlar, beyin düşüncə adamlarının sözlərinə önəm vermirlər. Kür, kanallar və çaylar quruyub. Şirin su ilə əlaqəli problemlər yaşayırıq, meşə yanğınları baş verir.
Eyni zamanda total səhralaşma gedir. Bunun qarşısını yalnız dünyanın düşüncə adamlarını birləşdirib, bir çox qadağalar qoymaqla, Paris İqlim Konvesiyasına qoşulub, onun bütün bəndlərini yerinə yetirməklə almaq olar.
Həmçinin əhalinin çoxalmasının qarşısı alınmalıdır. İndi Azərbaycanda uşaq pulu istəyirlər. Fikirləşmirlər ki, verilməyib əhali belə artır.
Əgər uşaq pulu ödənilsə, necə olacaq? Afrika və şərq ölkələrində əhalinin sürətlə artımı var və acından ölürlər. Onlar inkişaf etmiş ölkələrə yalvarırlar ki, yemək verin. Əhalinin sayını artırmayın, təbii resurslarınızı məhv etməyin. Sonra da xahiş etməyin ki, qanuni və eyri-qanuni doğulan uşaqlarınızı dolandırsınlar.
Ona görə, biz sərt mövqe ortaya qoymuşuq. Bu dünyanın aparıcı beyin mərkəzlərinin və düşüncə adamlarının mövqeyidir. Mən də onları dəstəkləyirəm”.
