Onların taleyi barədə beynəlxalq təşkilatlar susqunluq nümayiş etdirir
Nəticəyə məhz məhkəmə vasitəsilə nail olmaq mümkündür
Nəticəyə məhz məhkəmə vasitəsilə nail olmaq mümkündür
Azərbaycanın İnsan Hüquqları üzrə Müvəkkili (Ombudsman) Səbinə Əliyeva Avropa Şurasının insan hüquqları üzrə komissarı Dunya Miyatoviçi qəbul edib.
Görüş zamanı Ombudsman qonağın ünvanladığı sualları cavablandıraraq ölkəmizdə insan hüquq və azadlıqlarının səmərəli müdafiəsi üzrə həyata keçirilən islahatlardan, o cümlədən “Azərbaycan Respublikasının İnsan Hüquqları üzrə Müvəkkili (ombudsman) haqqında” Konstitusiya Qanununa edilmiş dəyişikliklərdən bəhs edib, Müvəkkil insan hüquqlarının müdafiəsi sahəsində gördüyü işlər, müharibə və postmüharibə dövründə həyata keçirilən fəaliyyət barədə geniş məlumat verib. Ombudsman Ermənistanın Azərbaycana qarşı işğalçılıq və terror siyasətindən danışıb, Birinci Qarabağ müharibəsində 4000-ə yaxın azərbaycanlının itkin düşdüyünü, onların taleyi barədə Ermənistan tərəfindən hələ də məlumat verilmədiyini qeyd edib. S.Əliyeva itkin düşmüş vətəndaşlarımızın ailə üzvlərinin istək və tələblərini Avropa Şurasının insan hüquqları üzrə komissarının diqqətinə çatdıraraq səlahiyyətləri çərçivəsində köməklik göstərilməsini xahiş edib. Müvəkkil işğaldan azad edilmiş ərazilərimizdə Ermənistanın törətdiyi mina terrorundan bəhs edib, dəfələrlə müraciət edilməsinə baxmayaraq, dəqiq mina xəritələrinin ölkəmizə təhvil verilmədiyini, basdırılmış minaların insanların həyatına təhlükə yaratdığını, keçmiş məcburi köçkünlərin öz doğma torpaqlarına qayıdışına maneə törətdiyini qeyd edib. Ombudsman Vətən müharibəsindən indiyədək 330-dan çox şəxsin mina qurbanına çevrildiyini qonağın diqqətinə çatdırıb.
Müvəkkil otuz illik işğal dövründə Ermənistan tərəfindən torpaqlarımızda tarixi, dini abidələrin, azərbaycanlılara məxsus qəbiristanlıqların dağıdıldığını qeyd edib.
S.Əliyeva Milli Preventiv Mexanizm fəaliyyəti çərçivəsində saxlanılan şəxslərin öz iradəsi ilə tərk edə bilmədiyi müəssisələrə başçəkmələrin həyata keçirildiyini, heç bir ayrı-seçkiliyə yol verilmədən şəxslərin qəbul olunduğunu söyləyib.
Ombudsman Qarabağda yaşayan erməniəsilli vətəndaşların hüquq və azadlıqlarının təmini və müdafiəsinin daim diqqət mərkəzində olduğunu, Müvəkkilə müraciət etmək yolları ilə bağlı açıqlama verildiyini qeyd edib, Vətən müharibəsindən əvvəl də erməniəsilli vətəndaşların müraciətlərinə baxıldığını və müvafiq tədbirlərin görüldüyünü qonağın diqqətinə çatdırıb.
Görüşdə həmçinin təsisatlar arasında gələcək qarşılıqlı əməkdaşlıq əlaqələri barədə fikir mübadiləsi aparılıb.
Maraqlıdır, itkin düşmüş vətəndaşlarımızın taleyi barədə beynəlxalq təşkilatlar bizə necə kömək edə bilər?
Hüquq müdafiəçisi Səadət Bənənyarlı isə hesab edir ki, əsir və itkin düşmüş şəxslərin taleyi, hüquqları ilə bağlı beynəlxalq məhkəmədə məsələ qaldırılmalıdır:
“Şübhəsiz ki, müvafiq qurumlar və vətəndaş cəmiyyətləri tərəfindən beynəlxalq ictimaiyyətə itkinlərlə bağlı müraciət edilir, müxtəlif platformalarda məsələ gündəmə gətirilir. Məsələ ilə bağlı Azərbaycan Xarici İşlər Nazirliyi dəfələrlə bəyanat verib. Lakin bu istiqamətdə müxtəlif konvensiyalar varsa, demək, nəticəyə məhz məhkəmə vasitəsilə nail olmaq mümkündür.
Müvafiq konvensiyalar Ermənistanı beynəlxalq məhkəmələr vasitəsilə bu barədə məlumat verməyə məcbur edər. Girovlar, itkin düşmüş vətəndaşlarımız haqqında məlumatı birbaşa əldə etmək üçün onların müharibədən sonrakı taleyi barədə məsələni BMT-yə çıxarmaq lazımdır. Dövlət bu istiqamətdə səy göstərməlidir ki, bu istiqamətdə məhkəmə keçirilməsinə nail olaq.
Hazırkı mərhələdə Ermənistan bilir ki, kütləvi məzarlıqların olduğunu qəbul etsə, cinayəti boynuna almış kimi görünəcək, ona görə də daim boyun qaçırır. Çox təəssüf ki, beynəlxalq ictimaiyyət də məsələyə laqeyd yanaşır”.
