Bütün platformalar Qoşulmama Hərəkatının beynəlxalq nüfuzunun artırılması üçün təkamül prosesidir.
Bakıda Qoşulmama Hərəkatının Qadın Hüquqlarının İnkişafı və Qadınların Səlahiyyətləndirilməsi üzrə konfransı keçirilib. Tədbirin əsas məqsədi Qoşulmama Hərəkatına üzv olan ölkələrin vətəndaş cəmiyyəti institutları arasında qadın hüquqlarının inkişafı və səlahiyyətlərinin artırılması ilə bağlı təcrübə mübadiləsinin aparılması və bu istiqamətdə əməkdaşlığın gücləndirilməsi üçün platformanın yaradılmasıdır.
Prezidenti İlham Əliyevin konfrans iştirakçılarına ünvanladığı müraciətdə deyilib ki, Qoşulmama Hərəkatının qadın platforması təsis olunacaq:
"Qoşulmama Hərəkatı qadınların hüquqlarının müdafiəsi sahəsində vacib rol oynamaq imkanına malikdir. Qoşulmama Hərəkatının Qadınlar Platformasının təsis edilməsi bu istiqamətdə fəaliyyətə müsbət təkan verəcəkdir".
Qoşulmama Hərəkatına sədrliyimizin sonu yaxınlaşmaqdadır: "Böyük qürur hissi ilə qeyd edirəm ki, Azərbaycan Qoşulmama Hərəkatının ən gənc üzvlərindən biri olmasına baxmayaraq, sədrliyi təhvil alacaq növbəti ölkələrə uğurlu miras qoyacaqdır. Ölkəmiz bundan sonra da Qoşulmama Hərəkatının məqsədlərinin və məramının beynəlxalq səviyyədə təşviq edilməsi istiqamətində səylərini davam etdirəcəkdir.
Əminəm ki, bu əlamətdar konfrans qadınların hüquqlarının inkişaf etdirilməsi və səlahiyyətlərinin artırılması ilə bağlı səmərəli fikir mübadiləsinin aparılması üçün əhəmiyyətli platforma rolunu oynayacaq və bu sahədə birgə fəaliyyətin aparılması üçün Qoşulmama Hərəkatının tarixində yeni bir dövrün başlanğıcının əsasını qoyacaqdır.
Azərbaycan Gənc Demokratlar İnstitutunun rəhbəri, politoloq Yeganə Hacıyeva isə “Sherg.az”a açıqlamasında son illər bütün dünyada qadın hərəkatının daha da gücləndiyini və bu sahəsinin dövlət tərəfindən daim diqqət mərkəzində saxlandığını qeyd edib.
O, ölkəmizdə tarixən qadın hüquqlarının hər zaman diqqətdə saxlanıldığını, cəmiyyətin qadın iştirakçılığı sahəsində böyük yol qət edildiyini söyləyib və bu gün də dövlət siyasətində bu sahə prioritet istiqamət olduğunu diqqətə çatdırıb.
Azərbaycan Gənc Demokratlar İnstitutunun Uqanda FORWO qadın təşkilatı ilə keçirdiyi beynəlxalq tədbiri xatırladan Y. Hacıyeva qeyd edib ki, 33 ölkədən 37 iştirakçının iştirakı ilə beynəlxalq konfrans keçirdik:
Azərbaycan Prezidentinin də müraciətindəki bu təklif Qoşulmama Hərəkatına üzv ölkələrin qadın təşkilatları tərəfindən çox ciddi qəbul olunaraq dəstəkləndi. QH hazırkı sədri, Azərbaycan Prezidentinin təklifinə ilk qoşulanlardan biri də bizim keçirdiyimiz konfransın iştirakçılar oldu. Biz də QH çərçivəsində sivil cəmiyyət institutları arasında , xüsusi ilə qadın təşkilatları arasında güvənli tərəfdaşlıq əsaslı bir platformanın formalaşdırılmasına qərar verdik".
