“Vatikan liderinin işğalçı Ermənistanla ərazisi zəbt olunan Azərbaycan arasında bərabərlik işarəsi qoyması effektli variant deyil”
Roma Papası Fransiskin Azərbaycana səfəri başa çatdı. Papanın ölkəmizə səfəri bir sıra məqamlarla yadda qaldı. Fransisk Bakıdakı çıxışlarında iman, sülh və ədalətdən danışdı. O, bəyan etdi ki, Azərbaycan təkkonfessiyalı ölkə deyil. Burada dini azadlıqlar tam təmin edilib. Papa xüsusilə vurğuladı ki, Prezident İlham Əliyevin multikulturalizmə söykənən dini dözümlülük siyasəti onun lap əvvəldən diqqətini çəkib.
Vatikan lideri üstüörtülü şəkildə Dağlıq Qarabağ münaqişəsinə də toxundu, ancaq ümumi sözlərə üstünlük verdi. Halbuki ondan əvvəl çıxış edən Prezident İlham Əliyev diqqəti Azərbaycan torpaqlarının işğalı faktına yönəltmişdi. Amma Roma Papası çıxışında "Dağlıq Qarabağ” və "ərazi bütövlüyü” ifadələrini işlətmədi. Bununla Vatikan başçısı Azərbaycanla Ermənistan arasındakı qarşıdurmada tərəf tutmadığını göstərmiş oldu. Papa sadəcə Qafqazdakı münaqişələrin sülh yolu ilə həllinə dua etdiyini bildirdi: "Azərbaycanda nə qədər insan qanlı münaqişədən əziyyət çəkir. Arzu edirəm ki, beynəlxalq ictimaiyyət bunu diqqətdə saxlasın və yardım göstərsin. Tanrının yardımı ilə dialoq və danışıqlar vasitəsi ilə Qafqaz regionundakı münaqişələr həll edilsin”. Məlumat üçün deyək ki, adətən, Roma papaları müsəlman əhalinin çoxluq təşkil etdiyi ölkələrə səfər etmirlər. Ölkəmizdə katoliklərin sayı bir neçə yüz nəfərdir. Buna baxmayaraq, indiyə qədər iki Roma Papası müsəlman Azərbaycana səfər edib. Birinci səfər 2002-ci ildə reallaşıb.
Papanın Azərbaycana səfəri və Bakıda verdiyi mesajlarla bağlı "Şərq”ə danışan millət vəkili Fazil Mustafa deyib ki, Fransiskin səfəri Azərbaycan dəyərlərinin katolik dünyasında tanıdılması baxımından əhəmiyyətli və faydalıdır. Amma Papanın problemlərə yanaşması qaneedici deyil. Deputatın sözlərinə görə, Papa Bakıdakı çıxışında xristian təəssübkeşliyini büruzə verdi: "Sözün açığı, Papanın çıxışları olduqca məntiqsiz idi. Vatikan liderinin işğalçı Ermənistanla ərazisi zəbt olunan Azərbaycan arasında bərabərlik işarəsi qoyması effektli variant deyil. Onun bir dəfə də olsa, işğal barədə danışmaması, təcavüzkar Ermənistana qarşı ağır ifadələr işlətməməsi Papanın səmimi olmamasını göstərir. Amma bütövlükdə səfərin əhəmiyyəti böyükdür. Xüsusən də Azərbaycan Prezidenti ilə Papanın görüşü mühümdür. Çünki həmin görüşdə Prezident Dağlıq Qarabağ məsələsini gündəmə gətirdi, işğalçı Ermənistanı ifşa etdi. Eyni zamanda digər problemlərlə bağlı danışdı. Bunlar Azərbaycanın strateji maraqları baxımından olduqca faydalı məqamlardır. Bu cür fürsətlərdən istifadə etmək lazımdır”.
İsmayıl
