Bundan belə ali pedaqoji təhsil almış şəxslər məktəbəqədər təhsil müəssisəsinə işə qəbul ediləcəklər. "Məktəbəqədər təhsil haqqında” qanun layihəsinin Milli Məclisdə müzakirəsi zamanı parlamentin Elm və Təhsil komitəsinin sədri İsa Həbibbəyli bu barədə məlumat verib. Komitə sədri qeyd edib ki, ölkədə məktəbəqədər təhsil şəbəkəsi getdikcə genişlənir, dövlət başçısının tapşırığı ilə regionlarda məktəbəqədər təhsil ocaqları açılır.
Belə vəziyyət gələcəkdə məktəbəqədər təhsil üzrə kadr çatışmazlığı yarada bilər. Bunu nəzərə alaraq qanun layihəsində ali pedaqoji təhsil almış mütəxəssislərin məktəbəqədər təhsil müəssisəsinə təyin edilməsi qanun layihəsində əksini tapıb. Komitə sədri xatırladıb ki, hazırda məktəbəqədər təhsil ocaqlarında yalnız bu ixtisas üzrə təhsil alanlar fəaliyyət göstərir.
Dəyişikliyi şərh edən Respublika Təhsil Şurasının sədri Əjdər Ağayev "Şərq”ə açıqlamasında ali pedaqoji təhsil almış şəxslərin fərqləndirilməli olduğunu dedi:
- Ali pedaqoji təhsil fizika üzrə də ola bilər, riyaziyyat üzrə də, idman üzrə də. İdman müəllimi ixtisası üzrə təhsil almış adamı məktəbəqədər təhsil müəssisəsinə, uşaq bağçasına necə işə götürmək olar?! Fizika, riyaziyyat, informatika üzrə ali pedaqoji təhsil almış adam uşaqlarla hansı tərbiyəvi iş aparacaq? Əgər söhbət ali pedaqoji təhsil almış şəxslərdən gedirsə, burada yalnız humanitar ixtisaslar üzrə təhsil almış şəxslər nəzərdə tutulmalıdır. Qanun layihəsinə də belə yazılmalıdır ki, kadr ehtiyacı yarandıqda ali pedaqoji humanitar ixtisaslı kadrlardan istifadə edilsin. Yəni, burada humanitar yönümlü ixtisaslar xüsusi vurğulanmalıdır. Ali pedaqoji təhsil almış şəxslər ucdantutma məktəbəqədər təhsil müəssisəsinə aid edilə bilməz. Məktəbəqədər təhsil xüsusi bir ixtisasdır. Bu ixtisas üzrə ali təhsil alanlar uşaqlarla işləmək bacarığına yiyələnirlər, uşaq psixologiyası, uşaq pedaqogikası, uşaqların qidalanması, uşaqlarla tərbiyəvi iş, uşaq sağlamlığı... uşaqlara aid nə varsa, hamısı burada öyrədilir. Ümumi ali pedaqoji təhsildə uşaqlarla bağlı lazım olan bütün biliklər öyrədilmir. Tələbələr bu biliklərə qismən yiyələnirlər. Çünki hər ixtisasın özünün istiqaməti, öz öyrənmə predmeti var. Tarix riyaziyyatı öyrənmir, riyaziyyat tarixi və s. digər ixtisaslar da o cümlədən. Yalnız sırf məktəbəqədər ixtisası üzrə təhsil alanlar məktəbəqədər təhsil ocaqları, uşaq bağçalarında fəaliyyət göstərmək üçün hazırlanır. Ona görə də qanun layihəsində bu məsələ dəqiq əksini tapmalıdır.
Ə.Ağayev məktəbəqədər ixtisası üzrə kadr çatışmazlığının yaranma ehtimalının da anlaşılmaz olduğunu bildirdi:
- Azərbaycan Pedaqoji Universiteti məktəbəqədər təhsil ixtisası üzrə kadr hazırlayır. Digər ali və orta ixtisas təhsili müəssisələri, kolleclər var ki, onlar da sırf məktəbəqədər təhsil ixtisası üzrə kadrlar, uşaq bağçası müəllimi hazırlayır. Bəs bu qədər kadr hara gedir ki, kadr çatışmazlığı yaranır?! Kadrlar var, sadəcə onları işə cəlb etmək lazımdır. Mövcud kadrlar işlə təmin edilsələr, heç bir çatışmazlıq da yaranmaz.
Məlahət Rzayeva
