Rusiya Mərkəzi Seçki Komissiyasına Rusiya prezidenti vəzifəsinə namizədlərin irəli sürülməsi ilə bağlı 33 müraciət daxil olub. Bu barədə Rusiya Federasiyası Mərkəzi Seçki Komissiyasının sədri Ella Pamfilova deyib. Onun sözlərinə görə, 9 şəxsin namizədliyini siyasi partiyalar, 24 şəxs isə özü öz namizədliyini irəli sürüb. Qeyd edək ki, Rusiyada prezident seçkiləri 2024-cü il martın 17-nə təyin edilib.
Politoloq Azər Qasımov "Sherg.az"a deyib ki, Rusiyada keçiriləcək prezident seçkilərinin formal xarakter daşıdığı heç kimə sirr deyil.
Analitik vurğulayıb ki, bu, avtokratik rejimlərin xarakterik xüsusiyyətidir:
"Əslində Ukrayna müharibəsi fonunda seçkidə dəyişiklik gözləmək də yanlış olardı. Hazırda Rusiyanın gələcək taleyi həll edildiyi bir məqamda yeni bir kimsənin hakimiyyətə buraxılmasına Rusiya "dərin dövləti" imkan verməz. Eyni zamanda indiki kritik durumu V.Putindən başqasının idarə edə biləcəyi mümkünsüz görünür. Hesab edirəm ki, seçkidə sürprizlər olmayacaq. Putinin qarşısına çıxan rəqib namizədlər sadəcə seçkinin rəngarəng keçməsi üçün bir bəzək ola bilər".
Ekspertin fikrincə, güclü rəqib kimi Putinin qarşısına çıxmaq üçün demokratik şərait lazımdır:
"Bu da Rusiyada yoxdur. Putinin isə öz rəqibləri ilə necə davrandığı göz önündədir Priqojin məsələsini hamı yaxşı bilir və yəqin ki, heç kim onun yerində olmaq istəməz. Güclü rəqib olmaq üçün Qərbə bağlı olmaq lazımdır. Amma Rusiya ilə Qərbin münasibətləri fonunda hansısa namizədin taleyi də Priqojindən fərqli olmayacaq".
