Futbol üzrə Azərbaycan millisi yoldaşlıq görüşündə Haiti yığmasına məğlub olub.
Rəqibini Mehdi Hüseynzadə adına Sumqayıt şəhər stadionunda qəbul edən yığma 2025-ci ildəki ilk oyununda 0:3 hesabı ilə uduzub.
Rəqibin heyətində Frantsdi Pyerro (9, 63) dubl müəllifi olub. Digər qolu isə Jan Jak (83) aktivinə yazdırıb.
Millimizin heyətində 84-cü dəqiqədə Elvin Cəfərquliyev qırmızı vərəqə alaraq meydandan qovulub.
Qeyd edək ki, Fernandu Santuşun rəhbərlik etdiyi kollektiv üç gün sonra "Bank Respublika Arena"da Belarus seçməsini sınağa çəkəcək.
İctimai Televiziyanın İdman departamentinin rəhbəri Kənan Hakimov "Sherg.az"a bildirib ki, Haiti millisi bəzilərinin düşündüyü kimi heç də zəif yığma deyil:
“FİFA reytinqində bizdən öndədirlər. Üstəlik heyətlərinə nəzər yetirdikdə Fransa, Türkiyə, Danimarka, Yunanıstan və Avropanın digər ölkələrində çıxış edən legionerlər mübarizə apardığını müşahidə etmək olar. Elə qapımıza 2 qol vuran 20 nömrəli futbolçu Pierrotun da transfer dəyəri 3.5 milyon avrodur. Hazırda Yunanıstanın AEK klubunda çıxış edən mərkəz hücumçusu yayda Sabah-a Makkabi Hayfa oyununda da dubl etmişdi. Bir sözlə rəqib heyəti Avropada çıxış edən legionerlərdən ibarət komanda idi. Bizimlə oyunda isə ardıcıl 9-cu qələbələrini qazandılar. Buna baxmayaraq bu rəqibə Sumqayıtda 0:3 hesabı ilə məğlub olmamalıydıq. Mənə görə səbəblərdən biri odur ki, Fernando Santuş millimizi hücum futbolu oynatmağa çalışmasıdır. Fikir verdinizsə oyundan sonra keçirilən mətbuat konfransında o bildirdi ki, bundan sonra daha çox müdafiədə oturub əks-hücumlara üstünlük verəcəyik. Bizim kimi futbolçu potensialı zəif olan komandaya hücum futbolu oynatmaq bir qədər çətindir. Digər məsələ məncə heyətlə bağlı seçimlərdir. Santuşun statistikası hələ ki, uğursuzdur. 7 oyundan 6-da məğlubiyyət və 1 heç-heçə. Bəlkə futbolçularla kommunikasiya ilə bağlı müəyyən problemlər var. Ola bilər martın 25-i Masazırda keçiriləcək Belarusla oyunda millimizin baş məşqçisi kimi ilk qələbəsini qazana. Ümid edirəm həm bu oyun, həm qarşıda bizi gözləyən 3 yoxlama oyunundan lazımı nəticələr çıxaracaq. Çünki bu yoxlama oyunları məhz seçmə mərhələyə hazırlıqlı olmaq üçün nəzərdə tutulub. Qrupda rəqiblərimiz isə çox güclüdür. Ona görə də qarşıdakı 3 oyunda millimizin hansı futbolu və necə oynamaq istədiyini görməliyik”.
