İstanbul Azərbaycana məhsul ixracında lider olan ölkələri üstələyib.
Oxu.Az xəbər verir ki, bu ilin yanvar-aprel aylarında İstanbuldan Azərbaycana 392 milyon 742 min ABŞ dolları dəyərində məhsul ixrac edilib.
Türkiyənin İxracat Məclisinin və Dövlət Gömrük Komitəsinin hesabatlarına əsasən, bu, ötən ilin müvafiq dövrünə nisbətən 5,1 faiz çoxdur.
2023-cü ilin aprelində isə İstanbuldan ölkəmizə 86 milyon 965 min dollarlıq məhsul gətirilib ki, bu da keçən ilin analoji dövrü ilə müqayisədə 24,5 faiz azdır.
Diqqətə çatdıraq ki, Türkiyənin Azərbaycana məhsul ixrac edən şəhərləri arasında İstanbul liderdir. Həmçinin İstanbul Azərbaycanın məhsul idxal etdiyi əsas ölkələrin də əksəriyyətini üstələyib. Belə ki, bu şəhərdən məhsul idxalının dəyəri Türkmənistan, Almaniya, Fransa, İran, ABŞ, İtaliya, Qazaxıstan, Böyük Britaniya, Yaponiya, Belarus, Koreya, Ukrayna və digər ölkələrdən çoxdur. Bir sözlə İstanbuldan məhsul idxalının göstəricisi Rusiya və Çindən sonra gəlir və Türkiyədən məhsul idxalının təxminən 50 faizini əhatə edir.
