Zaur Məmmədov:“Reallıq odur ki, Ermənistanda hansısa tərəqqi yalnız və yalnız Qarabağ münaqişəsinin Azərbaycanın xeyrinə həllindən sonra mümkündür”
Ermənistanın sabiq prezidenti Robert Koçaryan “Qolos Armenii” nəşrinə müsahibəsində deyib ki, indiki hakimiyyətin ömrü qısa olacaq və bu cür idarəetmə ilə hazırkı baş nazir ikinci dəfə seçilə bilməyəcək. Sabiq prezident bildirib ki, yüksək ehtimalla ölkədə növbədənkənar parlament seçkiləri keçiriləcək: “Seçicilər populist siyasətçilərin boş vədlərindən təngə gəliblər və seçkilərdə bunu aydın ifadə edəcəklər”. Koçaryanın sözlərinə görə, Ermənistan müxalifətinin birləşməsi üçün çox əlverişli şərait yaranıb: “Hakimiyyətə qarşı çıxış edən müxalifətin müxtəlif mərkəzləri olacaq, lakin onların arasında fəal qarşılıqlı fəaliyyət yaranacaq”.
![](https://sherg.az/uploads/editor/5f70e1a58c93ce9e624a8e91bbeb37b2.jpg)
Sabiq prezidentin açıqlamalarını “Sherg.az”a dəyərləndirən Bakı Politoloqlar Klubunun rəhbəri, siyasi elmlər namizədi Zaur Məmmədov deyib ki, Koçaryanın Paşinyan haqqında dediklərində həqiqət var.
Lakin bu həqiqət ondan ibarətdir ki, nə Koçaryan-Sarkisyan, nə də Paşinyan hakimiyyəti daxili və xarici çağırışlara cavab verə bilir:
“İndi Paşinyanın etdiklərini vaxtı ilə Koçaryan və Sarkisyan eyniylə həyata keçirib. Reallıq odur ki, Ermənistanda hansısa tərəqqi yalnız və yalnız Qarabağ münaqişəsinin Azərbaycanın xeyrinə həllindən sonra mümkündür. Müəyyən dövlətlər və ya qüvvələr Ermənistanın arxasında dayana bilərlər. Amma dünyadakı iqtisadi böhran dövründə üç-beş ölkənin ac-susuz Ermənistanın yanında olması erməni xalqına müsbət heç nə vəd etmir”.
Analitikin fikrincə, Paşinyanın hakimiyyətə gəlməsindən 16 ay keçib və bu müddət ərzində xalq yavaş-yavaş eyforiyadan çıxmağa başlayıb:
“Müxalifət də məhz indiki zamanı gözləyirdi, ona görə də bir müddət passif dayanmışdılar. Fürsət gözləyirdilər ki, lazım olan məqamda hücuma keçsinlər. Koçaryan parlamentin müxalifətinə eyham vurur ki, onlar da “Qarabağ klanı”nın yanında olmalıdır. Əks halda parlament fraksiyasının öz sosial bazasını itirəcəyini iddia edir”.
Z.Məmmədovun sözlərinə görə, Paşinyanın uzun müddət hakimiyyətdə qalması sual altındadır:
“Baş nazir hökuməti devirdiyi küçə yürüşləri ilə siyasi hakimiyyətdən uzaqlaşa bilər. Amma Koçaryan-Sarkisyan cütlüyünün hansısa formada yenidən hakimiyyətə gəlməsi mümkünsüzdür. Koçaryan Bidzina İvanişvili kimi hakimiyyəti kölgədən idarə edə bilər. Çox güman ki, hökumətdə yeni simalar yer alacaq. Ümumilikdə isə Ermənistan daxilində baş verənlər Azərbaycan üçün vacibdir. Ona görə ki, Dağlıq Qarabağ münaqişəsi məhz İrəvan hökumətinin aqressiyası nəticəsində 30 ilə yaxındır davam etməkdədir.
Düşmən ölkədə cərəyan edən siyasi proseslər münaqişənin həllinə mənfi təsir edən ən böyük səbəblərdəndir”.