ABŞ-nin yeni seçilmiş prezidenti Donald Tramp bacarıqlı mühacirlərin ABŞ-də işləməsinə icazə verən H1-B vizasını dəstəklədiyini açıq şəkildə ifadə edib.
Sherg.az xəbər verir ki, “New York Post”a danışan Tramp, Space X-in sahibi İlon Maskın H1-B viza statusunun zəruriliyini müdafiə edən açıqlamalarından sonra ABŞ şirkətlərinə xarici ekspert işçiləri işə götürməyə imkan verən H1-B viza proqramını dəstəklədiyini açıqlayıb.
"Mənim mülklərimdə çoxlu H-1B vizası var. Mən H-1B-yə inanıram. Mən bunu dəfələrlə sınamışam. Bu, əla proqramdır", - Tramp deyib.
İlk prezidentlik dövründə xarici işçi vizalarına məhdudiyyətlər qoyan və proqramı tənqid edən Tramp son açıqlaması ilə Respublikaçı bazanı parçalayan bu məsələ ilə bağlı mövqeyini açıq şəkildə ortaya qoyub.
Tramp daha əvvəl ABŞ-də ali təhsil alan tələbələrə Yaşıl Kart vəd etmişdi.
Seçki prosesində yüz milyonlarla dollar xərcləyərək Donald Trampa dəstək verən iş adamı Elon Mask ilə Respublikaçılar Partiyasının digər liderləri arasında ABŞ-də ixtisaslı mühacirlərə H1-B vizalarının verilməsi məsələsində fikir ayrılığı son vaxtlar daha çox özünü büruzə verir.
Elon Musk bu həftə X-də verdiyi açıqlamalarda ABŞ-də texnologiya şirkətlərində təcrübə tələb edən vəzifələrdəki boşluqların “yerli istedadlarla” doldurula bilməyəcəyini bildirib.
